Bibliotekturné om antirasisme til fem vestlandskommunar

Vestland fylkeskommune og Likestillingssenteret på Vestlandet samarbeider i haust om bibliotekturneen i Vestland. Vi startar i Øygarden 29. oktober, og det siste møtet blir i Kvinnherad 18. november.

Turneen er del av oppfølginga av fylkestingsvedtaket om Vestland som antirasistisk sone.

Dialog, refleksjon og erfaringsdeling

Møta skjer på det lokale biblioteket i kvar kommune, i samarbeid med biblioteka og innbyggartorga på staden. På møta får deltakarane mellom anna snakke om kva rasisme er, og korleis det kjem til uttrykk i kvardagen. Det blir lagt opp til diskusjon om korleis vi kan fremje like moglegheiter for deltaking og tilhøyrsle i lokalsamfunnet. Det blir lagt opp til dialog og refleksjon mellom deltakarane og høve til å dele eigne erfaringar.

Biblioteka er valde som arena fordi dei er opne, lågterskel-møteplassar som dei fleste innbyggjarar kjenner og brukar.

Vestland som antirasistisk sone 

Fylkestinget i Vestland vedtok i 2020 at fylket skal vere ei antirasistisk sone. Det inneber at fylkeskommunen aktivt skal arbeide for å avdekke og motverke rasisme, både i eigen organisasjon og i samfunnet elles. Biblioteksturneen er finansiert gjennom prosjektet "Vestland fylke som antirasistisk sone", som har fått tilskot frå Barne-, ungdoms- og familiedirektoratet (Bufdir).

Les meir om og meld deg på dialogmøta:

• Øygarden innbyggartorg og bibliotek – 29. oktober, kl. 19.00 til 21.00
• Sogndal bibliotek – 10. november, kl. 18.00 til 20.00
• Gloppen bibliotek – 11. november, kl. 18.00 til 20.00
• Stryn bibliotek – 12. november, kl. 19.00 til 21.00
• Kvinnherad bibliotek – 18. november, kl. 18.00 til 20.00