Privatskular

Fylkeskommunen har ansvar etter lova å sikre elevar i privatskular individuell tilrettelegging i skulen. Privatskulane har ansvar for å avdekke behov om individuell tilrettelegging og melde frå om behovet. Samstundes har dei ansvar for å følgje opp elevar og sjølve gjennomføringa av den individuelle tilrettelegginga.  

Etter privatskolelova § 3-6 har elevar i privatskular same rett til individuell tilrettelegging som elevar i offentlege skular. Difor gjeld reglane om individuell tilrettelegging i opplæringslova §§ 11-4 til 11-11 tilsvarande for privatskular.  

Det er heimfylket til elev i privatskule som har ansvar for å fatte enkeltvedtak om individuell tilrettelegging.  

Retten til personleg assistanse eller fysisk tilrettelegging og tekniske hjelpemiddel 

Dersom eleven treng individuell tilrettelegging etter opplæringslova § 11-4 (personleg assistanse) eller § 11-5 (fysisk tilrettelegging og tekniske hjelpemiddel), er det som hovudregel ikkje nødvendig med ei tilvising til PP-tenesta for sakkunnig vurdering. 

Fylkeskommunen treng likevel eit forsvarleg grunnlag før det blir fatta enkeltvedtak, og kan difor be om til dømes legeerklæringar som dokumentasjon for eleven sitt behov.   

Retten til individuelt tilrettelagd opplæring 

Dersom eleven treng individuelt tilrettelagd opplæring etter opplæringslova § 11-6, er det eit krav om sakkunnig vurdering frå PP-tenesta før enkeltvedtak blir fatta. I desse tilfella må elev først tilvisast til PP-tenesta for ei sakkunnig vurdering. Dersom eleven i tillegg treng individuell tilrettelegging etter opplæringslova §§ 11-4 og 11-5, må PP-tenesta gjera ei heilskapleg vurdering av eleven sitt behov i den sakkunnige vurderinga.  

Når sakkunnig vurdering er ferdig utarbeida, må det sendast søknad om individuelt tilrettelagd opplæring til fylkeskommunen. Den sakkunnige vurderinga og samtykkje til enkeltvedtak må leggjast ved søknaden. Samtykkeskjema til enkeltvedtak kan lastast ned for signering, eller det kan nyttast digital samtykkeskjema dersom den som skal gi samtykke loggar inn med godkjend ID.  

Dersom det er openbert at ein elev ikkje kan få eit tilfredsstillande utbytte av det ordinære opplæringstilbodet, og eleven allereie er tilvist til PPT, kan fylkeskommunen unntaksvis vurdere eit enkeltvedtak før ei gyldig sakkunnig vurdering ligg føre. Eit slikt enkeltvedtak gjerast på grunnlag av anna tilgjengeleg dokumentasjon om eleven sitt behov, og har til føremål å sikre eleven eit tilfredsstillande utbytte av opplæringa fram mot ei ny sakkunnig vurdering og enkeltvedtak ligg føre.  

• Rutine for saksbehandling av personleg assistanse og fysisk tilrettelegging i  privatskular (.pdf)
• Rutine for saksbehandling av individuelt tilrettelagd opplæring i privatskular (.pdf)
• Retningslinjer og rammeverk for saksbehandling av individuell tilrettelegging i privatskule (.pdf)
• Mal - Samtykkeskjema for enkeltvedtak om individuelt tilrettelagd opplæring
• Behandling av klager på vedtak om spesialundervising for elevar i privatskular (.pdf)
• Behandling særskilt språkopplæring for elevar i privatskular (.pdf)

Dersom du må tilvisast til PPT for ei sakkunnig vurdering, kan du finne meir informasjon og digital skjema for tilvising på nettsida vår. 

Dersom du ikkje har moglegheit til å bruke digital skjema kan du bruke alternativ tilvising til PPT (.pdf)