Nytt verktøy sikrar meir openheit og oversikt over tilskotsforvaltninga i kultursektoren
Med eit tastetrykk kan du no sjå korleis fylkeskommunale tilskot innan kultur, idrett og inkludering har blitt tildelte sidan 2020, fordelt mellom ulike tilskot og mellom kommunane i fylket.
Vestland fylkeskommune har fordelt over 2,9 milliardar kroner i tilskot til kultur, idrett og inkludering sidan fylket vart til i 2020. Hovudutval for kultur, idrett og inkludering har sett administrasjonen i sving med eit omstillingsarbeid innan tilskotsforvaltning. Sentralt i dette er å opne opp og systematisere oversikt over korleis tilskot har blitt fordelte så lenge Vestland har eksistert. I verktøyet kan du sortere på år, kategori (stipend, driftstilskot, prosjekt), region, kommune og støtteordning.
Håpar potensielle søkjarar tek det i bruk
– For å utvikle kulturlivet treng vi kunnskap om korleis tilskota våre fordeler seg. Denne oversikta gir oss politikarar eit betre avgjerdsgrunnlag, og gjer prioriteringsdebatten transparent og kunnskapsbasert. Dette er resultatet av ei tydeleg politisk bestilling der vi ønsker meir oversikt og openheit, seier Jacob Nødseth, leiar for hovudutval for kultur, idrett og inkludering.
Verktøyet er del av ei stor politisk bestilling, der hovudutvalet skal evaluere tilskotsordningar og søknads- og avgjerdsprosessar, for å eventuelt kunne gjere endringar i tilskotsforvaltninga til fylkeskommunen.
– Sjølv om vi har vedteke eit svært offensivt kulturbudsjett i Vestland, så har vi fleire gode tiltak enn det er midlar til. Vi kan ikkje berre krevje meir midlar til sektoren vår utan å samtidig ha evne til innovasjon og fornying, dei same krava må gjelde vår sektor som for andre sektorar i fylkeskommunen. Difor ser vi no på driftstilskotslista vår, og korleis vi innrettar dei mange prosjektordningane vi har. Skal vi vere Noregs leiande kulturfylke, må vi ha evne til omstilling, og det skjer gjennom openheit og kunnskap. I 2025 gjer vi eit stort arbeid som eg håpar gjer at vi kan skape politisk handlingsrom for å vidareutvikle kulturfylket Vestland, seier Nødseth.
Sorter tala som du vil
Det er fire sider i statistikken, med ulike høve til å sortere og sjå tilskotsfordelinga grafisk. På side to er det til dømes to kakediagram som syner fordeling av tilskotsordningar over og under ti millionar kroner. Der kjem det tydeleg fram at det aller meste av dei fordelte tilskota er anten driftstilskot eller spelemidlar.
Når det gjeld tilskot på kommunenivå, går det an å sjå både kva kommunar som får mest og å sjå kven som får mest per innbyggjar. Enkelte kommunar kan kome særleg godt ut i statistikken fordi dei har institusjonar med regionale funksjonar som har hovudsetet sitt der.
Ikkje berre fylkeskommunale pengar
Tilskota til kultur, idrett og inkludering er fordelte på over 50 tilskotsordningar. Det er tilskot som kjem frå fylkeskommunen sitt eige budsjett, det er tilskot som er øyremerkte i statsbudsjettet, og det er spelemidlar (overskotet frå Norsk Tipping A/S).
På denne sida er alle tilskotsordningane til Vestland fylkeskommune lista opp etter kategori.
Gjennom året kjem det meir informasjon på nettsida til fylkeskommunen om omstillingsarbeidet i kultursektoren.