Lyser ut 18 millionar til berekraftig verdiskaping i Vestland
Tilskotsordninga skal få fram nye idear, skape synergi og nye løysingar for berekraftig verdiskaping.
Saka oppsummert
- Vestland fylkeskommune lyser ut 18 millionar kroner til berekraftig verdiskaping.
- Tilskotsordninga skal fremje nye idear, skape synergi og utvikle løysingar for berekraftig verdiskaping. Satsingane i år er grøn næringsutvikling, areal til næringsutvikling, innovative og inkluderande samfunn og kompetanseutvikling i arbeidslivet.
- Vi prioriterer prosjekt som kan tilføre noko i tillegg til andre tiltak og prosjekt som eksisterer.
- Ordninga er retta mot næringsaktørar, kommunar, kunnskapsmiljø og andre utviklingsaktørar i Vestland. Søknadsfristen er 24. april, og det blir oppmoda til å delta på informasjonsmøte i mars.
Oppsummeringa er laga av KI-tenesta Copilot. Innhaldet er kvalitetssikra av kommunikasjonsseksjonen før publisering.
– Vi gler oss til å få inn nye, spennande søknader. I fjor støtta vi til dømes prosjekt innan kompetanseutvikling i arbeidslivet, fornybar energi, sirkulærøkonomi, helsenæringar, reiseliv, medieteknologi og marin satsing, medan fleire av hubane i Grøn region Vestland fekk støtte til sine konkrete prosjekt for å utvikle industriell symbiose. Prosjekta vil bidra til å styrke viktige satsingar og nye initiativ i fylket, seier Oddmund Klakegg, leiar for hovudutval for næring.
Kven kan søke?
Tilskotsordninga er retta mot næringsaktørar, kommunar, kunnskapsmiljø og andre utviklingsaktørar i Vestland.
Prosjekta skal bidra til verdiskaping i Vestland gjennom berekraftig bruk av naturressursar, grøn næringsutvikling og innovasjon. Dette skal vere med å bidra til at Vestland blir det leiande verdiskapingsfylket.
Sjå kva prosjekt som fekk støtte i 2024
Fire satsingar
Prosjekta skal vere forankra i regionale behov og samarbeid mellom partnarar. Dei må vere kopla til minst ei av dei fire satsingane i planen Berekraftig verdiskaping – regional plan for innovasjon og næringsutvikling. Satsingane er grøn næringsutvikling, areal til næringsutvikling, innovative og inkluderande samfunn og kompetanseutvikling i arbeidslivet. Vi prioriterer prosjekt som kan tilføre noko i tillegg til andre tiltak og prosjekt som eksisterer.
Grøn næringsutvikling
Denne satsinga har eit næringsliv i Vestland med netto nullutslepp som mål. Vi etterspør spesielt prosjekt som bidreg til å styrke sirkulærøkonomi og industriell symbiose, energieffektivisering, auka bruk av fornybar energi, eksporten frå fastlandsnæringar, arbeidet med heilårsarbeidsplassar i reiselivsnæringa og besøksforvaltning.
Areal til næringsutvikling
I denne satsinga er målet rett areal til rett føremål til rett tid. Prosjekt skal spesielt bidra til at Vestland har tilgang til nok eigna næringsareal som er basert på berekraftig bruk av naturressursar. Vi etterspør her samarbeid for å utvikle smartare og meir berekraftig bruk av areal i ein bu- og arbeidsmarknadsregion. Det kan gjelde på land og i sjø.
Innovative og inkluderande samfunn
I denne satsinga er målet verdiskaping og grøne arbeidsplassar i heile fylket. Her opnar fylkeskommunen for prosjekt knytt berekraftige bu- og arbeidsmarknadsregionar med like moglegheiter til å delta i verdiskaping. Vi etterspør spesielt prosjekt som kan styrke kommunane sitt arbeid med verdiskaping og sysselsetting og prosjekt som kan bidra til å inkludere fleire i arbeidslivet.
Kompetanseutvikling i arbeidslivet
Fleire arbeidstakarar med rett kompetanse er målet i denne satsinga. Her ønskjer vi spesielt prosjekt som bidreg til utvikling av kompetansehevings- og utdanningstilbod etterspurt av arbeidslivet, mobilisering til auka bruk av slike tilbod, og ulike strategiske samarbeid knytt til rekruttering av rett arbeidskraft.
Meld deg på informasjonsmøte
Søknadsfrist er 24. april. Alle som planlegg å søke blir oppmoda til å delta på digitalt informasjonsmøte 14. eller 18. mars. Kven som får støtte blir avgjort 11. juni.