UKM – Ung kultur møtest

I UKM kan du som er mellom 13 og 20 år delta med alle slags kulturuttrykk, alt frå sjonglering, dans, biletkunst, skulpturar til beatboksing, song, diktopplesing, musikk – og alt innimellom. Du kan også delta som konferansier, arrangør eller fotograf og i nettredaksjonen til UKM Media. Workshops og sosiale aktivitetar er sentralt innhald i fylkesfestivalane.

All påmelding skjer på nettsida til UKM Norge, og du melder deg på i kommunen der du høyrer til. Deretter er det kommunane som sender deltakarar vidare til fylkesfestivalen. I enkelte kommunar er den nedre aldersgrensa 10 år.

To fylkesfestivalar

Vestland fylkeskommune arrangerer kvart år fylkesfestivalar for UKM (Ung kultur møtest). Vi arrangerer ein festival nord i fylket og ein festival i sør. UKM er ein møteplass for ungdom mellom 13 og 20 år der ein kan delta med ulike kulturuttrykk som til dømes musikk, dans, biletkunst og dataspel. Det sosiale samværet er viktig.  

UKM 2025

I 2025 er det festival for region Hordaland i Åsane kulturhus i Bergen kommune, og for region Sogn og Fjordane er årets festival i Operahuset på Eid i Stad kommune. Begge arrangementa er helga 25.–27. april. På Eid vert det overnatting for deltakarane på Eid vgs. Informasjon om overnatting for for deltakarar i Åsane kjem så snart som råd.

UKM-festivalen 2025 (landsfestivalen) er i Trondheim 21.–25. juni.  

Det blir ikkje kåra vinnarar i UKM, men juryar i kommunane plukkar ut deltakarar i kommunearrangementa som får delta på fylkesfestivalen. På fylkesfestivalen plukkar ein ny jury ut deltakarar som får delta på den nasjonale festivalen.

Vestland fylkeskommune har ansvar for arbeidet med UKM på regionalt nivå og for gjennomføringa av UKM-festivalen for Vestland.

 

UKM er organisert av UKM Norge på nasjonalt plan, av fylkeskommunane på regionalt nivå og av kommunane lokalt. Målet er å gje barn og unge ein arena der dei kan vise fram sine eigne kulturuttrykk.

Kulturdepartementet har formulert dette oppdraget for UKM:

«UKM skal stimulere og synliggjøre ungdommens kulturelle aktivitet – lokalt, regionalt og nasjonalt. UKM skal være et landsomfattende arrangement – åpent for all ungdom».

Det viktigaste UKM-arbeidet skjer lokalt i kommunane der 25 000 ungdommar kvart år får oppleve UKM. I kommunane vert UKM organisert på mange ulike vis. Kommunen står sentralt i gjennomføringa av festivalar og tiltak som elles er knytt opp mot UKM. I nokre kommunar vert UKM arrangert i samarbeid med frivillige organisasjonar, medan andre legg større vekt på medverknad og deltaking frå ungdom.