Delte ut refleksvestar til ungdom i Eikefjorden
Det vart ein litt annleis skuledag for elevane ved Eikefjorden ungdomsskule, då undervisning i matte og norsk vart bytta ut med trafikksikkerheit og blindsoner.
Fylkesveg 611 har vore stengd vest for Eikefjorden sentrum sidan i haust grunna utskifting av to bruer på strekninga. Med stenginga vart også koblinga mellom sentrum og Eikefjord stadion kutta, og all trafikk gjennom bygda må no gå om riksveg 5 og ned Knapstadbakken, ein lokalveg som kjem ned midt i sentrum.
Resultatet av arbeidet skal stå ferdig om halvanna år. Ikkje berre vert det bygd nye bruer, men også ny gang- og sykkelveg. Tilhøva for gåande og syklande i Eikefjorden vil difor bli veldig mykje betre i 2026.
Men fram til då vil born og ungdom ha ein lengre veg til skule og fritidsaktivitetar, og få anleggsarbeid og massetransport tett på skulen, seier Bjørn Andre Storøy, prosjektleiar i Vestland fylkeskommune.
– Difor tok vi med oss ein lastebil og ei gravemaskin til ungdomsskulen, for å vise elevane korleis det er å sitte i førarsete i ein slik, og korleis blindsoner fungerer, fortel prosjektleiar.
Blindsoner er det området rundt bilen som ikkje er synleg for sjåføren, ikkje gjennom bilruta og ikkje i speglane.
– Det vi i prosjektet er mest redde for er at eit barn eller ein ungdom på sykkel eller til fots skal bli fanga i blindsona og køyrt på, og dette vil vi gjere alt vi kan for å unngå. Det betyr at sjåførane må vere ekstra observante, og at ungdommane må ta seg tid og vere forsiktige når dei skal passere ei anleggsmaskin som er i arbeid, seier Storøy.
For at ungdommane i Eikefjorden skal vere godt synlege i vinterhalvåret fekk alle utdelt spesialdesigna refleksvestar frå Vestland fylkeskommune, med ei oppmoding om å bruke desse når dei skal til skule eller trening.
