Søk om støtte til FoU-møte for å avklare forskingsbehov i næringslivet (FORREGION Vestland)

Eit FoU-møte samlar fleire bedrifter til diskusjon om ei konkret problemstilling som har relevans for dei alle. Målet er å avklare kunnskapsstatus og behovet for ny kunnskap, og å drøfte korleis bedriftene ved hjelp av forsking kan finne nye og gode løysingar på den aktuelle problemstillinga.

Kven kan søke?

Næringshagar, inkubatorar, klynger, næringsutviklingsselskap eller kapasitetsløft i Vestland fylke. Kontakt ein kompetansemeklar for nærare avklaring

Kva kan du søke om?

I 2025 vert det lagt opp til eit noko meir dynamisk oppsett av støtte til desse møta med tre ulike retningar:

Ordinære FoU-møte (50 000 kr) – som tidlegare
Utvida FoU-møte (70 000 kr) – først eit ordinært FoU-møte, deretter prosjektverkstad for å vidareutvikle prosjektforslag
Mobiliseringsmøte (10 000 kr) – Ein pott blir sett av til å kunne organisere mindre møter for å mobilisere ulike aktørar til å diskutere aktuelle tema som kan løftast fram i eit FoU-møte. Midlane skal kunne dekke møtelokale og ev. enkel bevertning. Kompetansemeklarar kan disponere denne potten via ein forenkla søknadsprosess.

Midlane kan brukast til førebuing, gjennomføring og etterarbeid i samband med møtet. 

Korleis kan du søke?

Søknad om støtte til FoU-møte skal skje i samarbeid med ein kompetansemeklar i FORREGION Vestland. Kompetansemekling er ei gratis rådgjevingsteneste.

Søknadsskjema finn du under støtteordninga FORREGION Vestland. Marker i søknadsskjema at det gjeld «FoU-møte». Søknaden vert sendt til Vestland fylkeskommune gjennom regionalforvaltning.

Nye brukarar må registrere seg på nettstaden regionalforvaltning.no. Du må registrer deg som organisasjon (ikkje privat søkar).