Samler tannhelsekompetansen i Solheimsviken
Helse- og omsorgsminister Jan Christian Vestre kom tysdag med ei gåvepakke til Vestland fylkeskommune. Regjeringa aukar tilskotet til TkVestland til 5,5 millionar kronar årleg. Pengane skal støtte planane om å samle fleire av tannhelsetenesta sine krefter under eitt tak i Solheimsviken.
Fylkesvaraordførar Stian Davies hadde invitert statsråden til ei omvising i Solheimsviken, der Vestland fylkeskommune skal byggje eit stort kraftsenter for tannhelse, på 3700 kvadratmeter, fordelt på fem etasjar.
Jan Christian Vestre fekk sjå lokala i femte etasje i CG Rieber-huset i Solheimsviken. Etter planen skal heile bygget huse tannhelsetenesta sitt kompetansesenter TkVestland, Dei held til i 1. etasje i bygget i dag. og Den tidlegare tannklinikken til studentsamskibnaden, som Vestland fylkeskommune overtok hausten 2024. .
I tillegg til den årlege statlege løyvinga til tannhelsetenesta får TkVestland i år 2,5 millionar kroner i statleg husleigestøtte. Dette blir trappa opp til 5,5 millionar kroner årleg.
Ombygginga tek til i februar 2027. Innflytting er venta i andre kvartal 2028.
Fleire pasientar og kortare ventetid
Delen av bygget som skal huse den nye allmennklinikken, blir eit viktig tiltak for å møte den aukande etterspurnaden etter offentleg tannhelsehjelp i Bergen.
Dei siste åra har den offentlege tannhelsetenesta fått ansvar for unge vaksne opp til 28 år. Dei får tannlegehjelp til 25 prosent av prisen. Men det har ei bakside: tydeleg press på kapasiteten, særleg i Bergen.
Tannhelsetilbodet følgjer opphaldsstad, ikkje folkeregistrert adresse. Difor har mange studentar krav på tilbod hos Vestland tannhelseteneste. Det har bygd seg opp ventetid på opp mot eitt år for denne pasientgruppa i Årstad/Solheimsviken.
– Glad for at fylkeskommunen allereie planlegg for framtida
Tannhelsetenesta har alt tilsett fleire tannbehandlarar og styrkt tilbodet i byen for å møte behovet. Dette la helse- og omsorgsministeren merke til.
– Eg er veldig glad i prosjekter som samlokaliserer styrkane og særleg forsking. All honnør til Vestland fylkeskommune for å tenke langsiktig, og for allereie å ha planlagt for å kunne ta i mot fleire pasientar, sa Vestre.
Samlar krefter under same tak
Det er framfor alt mangel på fysiske behandlingsrom som har avgrensa kor mange pasientar tannhelsetenesta kan ta imot. Den nye allmennklinikken i Solheimsviken får 12 behandlingsrom.
Men det som gjer satsinga særleg interessant, er samlokaliseringa med TkVestland, spesialisttannklinikken i regionen. Klinikken aukar kapasiteten sin frå ti til 17 behandlingsrom, og får i tillegg to operasjonsrom med narkosetilbod.
I dag er det store kapasitetsutfordringar ved spesialistklinikken, med inntaksstopp ved fleire av spesialiseringane. Samtidig har talet på tilvisingar auka jamt dei siste åra.
– Denne samlokaliseringa og utvidinga er eit stort løft av den offentlege tannhelsetenesta. Med dette får vi ned ventetida og opp kapasiteten. Etter kvart blir det òg meir behandling av pasientar i helgar og på kveldstid for å få ned ventetida. Det er bra, seier fylkesvaraordførar Stian Davies.
Mange fordelar
Å flytte TkVestland frå ulike lokasjonar i Årstadveien til Solheimsviken vil gi fleire fordelar i tillegg til fleire behandlingsrom:
- Tre eigne behandlingsrom til TOO-tilbodet (tortur, overgrep og tannlegeskrekk/frykt for tannbehandling), med moglegheit til å låne behandlingsrom av spesialistklinikken ved behov. Når TOO blir samlokalisert med resten av TkVestland, kan drifta også effektiviserast i form av betre utnytting av hjelpepersonell.
- Plass til fleire spesialistar som blir ferdigutdanna i klinikken. I dag er det ikkje nok kapasitet i lokala til å ta imot og gi arbeidsplass til spesialistkandidatane som fullfører utdanninga.
- Reduserte ventelister. Fleire spesialistar og auka kapasitet kan ta ned ventelistene, noko som er særleg viktig gitt inntaksstoppen på fleire spesialitetar og den sterke veksten i talet på tilvisningar og prioriterte pasientar.
- Systematisk hospitering og kompetanseheving.
- Betre tilrettelegging for praksisnær forsking
Nærleik til spesialistane gir betre behandling og kortare ventetid
Fylkestannhelsesjef Mette Fauskanger trur dette vil gi gevinstar langt utover sjølve kapasitetsauken.
– Når allmenntannklinikken og spesialisttannklinikken held til i same bygg, opnar det for tettare fagleg samarbeid i kvardagen. Det kan bety mykje både for dei tilsette og for pasientane. For dei tilsette ved allmenntannklinikken kan nærleiken til spesialistmiljøet bidra til auka kompetanse over tid. Tannbehandlarane får enklare tilgang til rådgjeving og fagleg støtte, noko som igjen kan gjere dei i stand til å handtere meir krevjande behandlingar sjølve, i staden for å tilvise pasienten vidare, påpeikar ho.
Eit konkret eksempel er kirurgisk fjerning av visdomstenner. Talet på tilvisingar til spesialist for slik behandling har auka mykje dei siste åra. Dersom fleire allmenntannlegar kan utføre dette sjølve, kan det redusere ventetida for pasientane.
Eit anna eksempel handlar om born som er engstelege for tannbehandling. Når allmenntannlegane held til i same bygg som spesialistar innan barnetannpleie og odontofobi, blir det lettare for dei å rådføre seg undervegs.
Ny tannhelsereform på høyring
Satsinga kjem samtidig som regjeringa varslar større endingar i tannhelsetenesta nasjonalt. Måndag la nemleg helseministeren fram forslag til ny tannhelsereform. Målet er at alle skal ha rett til nødvendig offentleg tannhelsehjelp og på sikt skal ingen betale meir enn 25 prosent for tannbehandling.
I forslaget som skal ut på høyring er det foreslått at rabatten gradvis skal rullast ut til nye grupper, og starte med dei yngste.
På omvisinga var Jan Christian Vestre svært interessert i å høyre kva dei som jobbar ved Solheimsviken tannklinikk/tannlegevakta meinte om den prioriteringa.
– Dei eldre! I alle fall dei som har mest behov for det først. Men midlane må vere på plass, seier tannlege Mahmoud Atashgahy. Kollegaene er samde.