Over 750 sommarjobbar til unge under 18 – kommunane i Vestland svarar på utfordring

I januar utfordra Vestland fylkeskommune, NHO Vestland og NAV Vestland kommunane til ein konkurranse: Kven klarer å tilby flest sommarjobbar til ungdommane sine? 

Ei fersk kartlegging gjort av Vestland fylkeskommune, viser at mange kommunar har teke utfordringa. Blant dei 33 kommunane som har svart på undersøkinga, er det registrert til saman 754 sommarjobbar for ungdom under 18 år.

Sunnfjord (80), Voss (83), Ullensvang (72) og Bergen (70) er blant kommunane med rekordmange jobbar øyremerkte unge under 18 år.

– Det gler meg stort at så mange kommunar har svart på oppmodinga. Dette viser at Vestland-kommunane forstår at kampen om kompetansen startar tidleg, og at dei er villige til å gjere noko med det. 754 unge under 18 får i sommar sin første smak av arbeidslivet. Det er 754 grunnar til å vere optimist på Vestland sine vegner, seier Askeland.

Sommarjobbsatsing med tydelege resultat

Sommarjobbsatsinga i Vestland, Sommarjobb i Vest, er eit samarbeid mellom Vestland fylkeskommune, NHO Vestland, NAV Vestland og LO, med støtte frå fleire sparebankar. Målet er å synleggjere karrieremoglegheiter i vest, gi unge ei tidleg erfaring frå arbeidslivet og førebyggje utanforskap.

Prosjektet er tett knytt til Inkludering i Vest, fylkeskommunen sitt breie arbeid for å få fleire unge og vaksne med svak tilknyting til arbeidsmarknaden inn i jobb. Sommarjobbsatsinga er eit av dei viktigaste verkemidla i dette arbeidet.

– Sommarjobbar bidreg til å førebyggje utanforskap. Klarer vi å få fleire i den store gruppa unge utan jobb eller utdanning inn i arbeidslivet, er det vinn-vinn, for ungdommane, for arbeidsgivarane og for samfunnet, seier Per Odd Grevsnes, prosjektleiar for Inkludering i Vest.

Klar oppmoding frå ungdomen sjølv

Å tilby sommarjobb til alle ungdomar som går ut av grunnskulen var ei oppmoding Marcus Askildsen, leiar i Vestland ungdomsutval kom med under Vestlandsmøtet i januar.

– Sommarjobbar handlar om meir enn nokre veker med lønna arbeid. Det gir unge ei kjensle av meistring og tilhøyrsel, og gir arbeidsgivarar ein sjanse til å sjå og utvikle framtidig kompetanse. Eg er imponert over korleis kommunane har svart på oppmodinga, med konkrete tilbod, lokale løysingar og vilje til å inkludere fleire unge. No må vi sørgje for at denne mobiliseringa blir varig inkludering, ikkje berre ein god sommar, seier Askildsen.

Fleire gir jobb til alle unge i kommunen

Grevsnes fortel at fleire kommunar i år gir tilbod om jobb til alle ungdommar i kommunen.

– Til dømes har alle unge i Hyllestad kommune mellom 15 og 18 år fått tilbod om jobb i 2-3 veker, medan Modalen kommune har vedteke å tilby sommarjobb til ungdommar i aldersgruppa 16 år til 20 år, og som er heimehøyrande i kommunen. Synergiane er tydelege, og kommunane nyttar ofte desse kandidatane til ekstraarbeid gjennom resten av året òg, seier Grevsnes.

Bergen kommune har ei stor satsing på heilårs ungdomsjobbar i kommunen for unge mellom 15 og 17 år. Ungdomane kan få jobb i barnehage, på SFO eller sjukeheim. Dette er eit tiltak i tillegg til dei 120 sommarjobbane dei har lyst ut i år, der 70 er for unge under 18.

– Sommarjobb er ein kjempefin måte å få erfaring frå arbeidslivet på. Det er også ei moglegheit til å teste ut ulike yrke før ein vel utdanningsløp. Eg håpar så mange som mogleg søkjer på dei 120 sommarjobbane vi har i Bergen kommune, seier byrådsleiar Christine Meyer.

Ullensvang satsar på ungdom heilt frå 13 år

Ullensvang har eigne kommunale jobbordningar for ungdom, i både barnehagar og SFO, med mål om å gi ungdom arbeidserfaring og ei tidleg tilknyting til arbeidslivet. Årets sommarjobbar i barnehagar er øyremerka ungdom som bur i Ullensvang kommune og er mellom 13 til 17 år. 

Lenger nord har Kinn kommune lansert ei ny sommarjobbsatsing retta mot ungdom.

– Nytt av året er at vi tilbyr 40 sommarjobbar til ungdom mellom 16 og 17 år i enten helse og velferd, barnehage, reinhald eller anna praktisk arbeid. Ungdom får tilbod om å jobbe fire timar per dag i tre veker, opplyser Stine Hovland, HR-rådgjevar i Kinn kommune.

Kva kommune som jobbar best med sommarjobbar for unge i 2026, vert kåra under Kompetanseforum Vestland sitt årlege stormøte 1. oktober.

Vestland fylkeskommune sine eigne sommarjobbar

Fylkestinget har løyvd ein halv million kroner ekstra til nye sommarjobbar for ungdom i Vestland fylkeskommune i 2026. Desse jobbane kjem i tillegg til dei ordinære sommarjobbane, og er fylkeskommunen sitt interne bidrag til Sommarjobb i Vest-prosjektet.

I år vart det lyst ut 114 sommarjobbar, der 38 av dei ordinære jobbane er øyremerkte kandidatar gjennom oppfølgingstenesta (OT).

Målet er at fleire ungdommar mellom 16 og 24 år som ikkje er i opplæring, arbeid eller annan aktivitet skal få erfaring frå arbeidslivet og byggje nettverk gjennom sommarjobb-ordninga.

Kandidatane som er tilsette gjennom OT-tenesta, vert tilsette som ordinære sommarvikarar. OT-tenesta tilbyr ekstra oppfølging der det trengst.

Har meld inn over 2200 sommarjobbar totalt

Kommunane vart òg bedne om å svare på kor mange sommarjobbar dei totalt har lyst ut i år. Her har dei 33 kommunane som har svart på undersøkinga rapportert inn til saman 2223 stillingar. Dette er estimerte tal, og det er grunn til å tru at det er enno fleire jobbar, særleg innan helse og omsorg.

Kommune	Kor mange sommarjobbar i kommunen sommaren 2026?	Kor mange av sommarjobbane er for ungdom under 18 år?
Alver	221	39
Askvoll	18	18
Askøy	17	0
Aurland	37	7
Austrheim	40	11
Bergen	120	70
Bremanger	56	20
Bømlo	9	1
Eidfjord	17	5
Etne	54	14
Fitjar	13	13
Fjaler	70	40
Gloppen	110	10
Gulen	60	9
Hyllestad	36	30
Høyanger	65	35
Kvinnherad	200	20
Kvam	50	20
Luster	50	16
Lærdal	24	12
Masfjorden	20	6
Modalen	17	13
Samnanger	22	22
Sogndal	40	-
Solund	5	20
Stad	60	30
Stryn	85	25
Sunnfjord	330	80
Tysnes	20	0
Ullensvang	228	72
Vik	36	13
Voss	83	83
Øygarden	10	0
Totalt	2223	754

 

Sommarjobbar i privat sektor

Ifølgje medlemsundersøkinga til NHO Vestland i mai, planlegg over éi av tre bedrifter i Vestland å tilsetje sommarvikarar i år. Reiseliv og mat og drikke er dei store bransjane som oftast tilbyr sommarjobbar til unge.

– 37 prosent av bedriftene i Vestland skal tilby sommarjobbar i år. Det er litt høgare enn landsgjennomsnittet, men likevel ein nedgang frå i fjor. Vi ser nedgang i dei fleste bransjar.

Det seier Sondre Olsen, fungerande regiondirektør i NHO Vestland.

NHO Vestland oppmodar alle bedrifter som har høve til det, om å tilsetje sommarvikarar.

– Sommarvikarar er langsiktig rekruttering. Særleg bransjar som har utfordringar med å få tak i nok folk med rett kompetanse, bør sjå om det kan vere mogleg å tilsetje unge ferievikarar, seier Olsen.

Også NHO Vestland skal for første gong kåre «Årets sommarjobb-bedrift», saman med LO.

Du kan framleis lyse ut

Har du ikkje lyst ut sommarjobb enno og ser at du treng ekstra hjelp?

Det er framleis ikkje for seint. På arbeidsplassen.no finn du ei enkel oppskrift for arbeidsgivarar. Saman kan vi gi fleire unge ein god start på arbeidslivet, og styrkje Vestland sin kamp om kompetansen.

Vidare tilrådd lesing:

Bedrifter i Vestland manglar over 6000 tilsette

KS starter FoU-prosjekt om sommerjobb for ungdom og unge voksne - Hjem