Gir innspel til Bergen sin arealplan: Vekst i byen styrkjer heile Vestland
Fylkesutvalet gir ros for at Bergen kommune gjennom KPA understrekar byen sin posisjon som motor i Vestland, men har samtidig innspel til mellom anna rammar for næringsutvikling og varierte bustadar. Etter kulturminnelova vert det fremja motsegn til fleire delar av planframlegget.
KPA 2027 er namnet på kommuneplanens arealdel i Bergen kommune, som denne hausten har vore på høyring.
I høyringssvaret sitt understrekar fylkesutvalet Bergen si rolle som fylkeshovudstad og motor i Vestland, og er glad for at framlegget til KPA har ambisjonar for vekst og utvikling av byen.
– Bergen kommune fortener ros for arbeidet med ein særs kompleks kommuneplan, og for at han så tydeleg understrekar rolla byen har som fylkeshovudstad. Dette styrkjer også Vestland og Vestlandet si konkurransekraft, både nasjonalt og internasjonalt. Fylkesutvalet legg vekt på at KPA2027 bidrar til å trekke til seg nye aktørar og næringar ved å balansere vekst og utvikling i høve til byens naturgitte og historiske kvalitetar, seier fylkesordførar Jon Askeland.
Fylkesutvalet meiner endringane bidreg til å nå dei nasjonale måla om 130 000 nye bustader, og understrekar at dette er viktig for Vestlandet.
Ønsker handelsanalyse
I tillegg til dette ber fylkesutvalet Bergen kommune om å gi tydelege rammer for næringsutvikling. Dette handlar mellom anna om å presisere at det i område avsett til industri og lager, ikkje skal vere verksemd med mange arbeidsplassar eller besøkande.
Dei ønsker også at kommunen skal vidareføre krav om handelsanalyse når det er forslag om etablering av handel utanfor sentrumsområde. Dette skal sikre byutvikling i tråd med måla dei regionale planane for attraktive senter.
Vil sikre variert bustadmasse
Fylkesutvalet ber også om at Bergen kommune endrar føresegnene sine for å sikre langsiktige behov og varierte bustadar. Bustadpolitikken bør sikre at det vert bygd fleire mellomstore bustader sentralt med gode kvalitetar som møter bustadbehovet til dei eldre. Kommunen bør også sikre at det vert etablert fleire familiebustader i levekårssonar med høg barneutflytting.
Motsegn om kulturminne
Fylkesutvalet vurderer også at kulturminne, kulturmiljø og kulturlandskap ikkje er tilstrekkeleg synleggjorde og sikra i planframlegget. Plankart og føresegner må gi tydelege rammer for forvaltninga og avklare når saker skal leggjast fram for kulturmiljøstyresmaktene. Fylkesutvalet fremjar fleire motsegn på dette området.
Les heile høyringsinnspelet til Bergen kommune
Fylkesutvalet fekk forlenga frist for tilbakemeldinga til Bergen kommune.
Du kan lese heile høyringsinnspelet frå Vestland fylkeskommune i saksprotokollen (under "Vedtak).