Vil bidra til vekst i havbruksnæringa – løyver fem millionar til forsking og samarbeid
Vestland fylkeskommune set av fem millionar kroner for å styrke arbeidet mot lakselus og betre vilkåra for villaks og sjøaure. Målet er at oppdrettsnæringa i fylket skal gå frå raud til grøn sone i trafikklyssystemet for oppdrett, og dermed kunne auke matproduksjon og verdiskaping framover.
Saka oppsummert
Vestland fylkeskommune vil styrkje havbruksnæringa og redusere lakselus og løyver fem millionar kroner til prosjekt som skal betre vilkåra for villfisk og gjere det mogleg å auke oppdrettsproduksjonen.
Prosjekta skal vere eit samarbeid mellom næring og forsking, og målet er meir kunnskap og betre tiltak. Alt skal evaluerast i 2026.
Oppsummeringa er laga av KI-tenesta ChatGPT. Innhaldet er kvalitetssikra av kommunikasjonsseksjonen før publisering.
Havbruk er ei viktig framtidsnæring i Vestland med stor verdiskaping og mange arbeidsplassar i kystsamfunna. I dag er Vestland i raud sone i trafikklyssystemet, noko som fører til redusert produksjon i oppdrettsanlegga.
– Lakselus er ein av hovudtruslane mot villfisk. Mange ulike tiltak er sett i verk for å redusera lusepåverknad på villfisken, utan at ein har tilstrekkjeleg kunnskap om kva som er dei beste løysingane. No må vi finne dei løysingane som faktisk verkar, seier Sigrid Brattabø Handegard, leiar for hovudutval næring i Vestland fylkeskommune.
Vestland fylkeskommune ønskjer å bidra til å snu utviklinga med meir kunnskap og treffsikre tiltak. Det er henta inn innspel frå næring, forvaltning og kunnskapsmiljø, og fylket har fått ei rekkje tilbakemeldingar. No får forskingsmiljø og næringsaktørar høve til å søkje om støtte til prosjekt som skal bidra til at havbruksnæringa i Vestland skal kunne auke produksjonen framover.
Midlane skal gå til forskings- og utviklingsprosjekt som:
- Reduserer mengden lakselus i oppdrettsanlegg
- Evaluerer tekniske løysingar og førebyggjande tiltak
- Undersøkjer kvifor laks og sjøaurebestandane går ned
- Legg til rette for samarbeid mellom næring, forsking og forvaltning
Vil vite kva som fungerer
– Trass i mange nye tiltak dei siste åra, manglar vi framleis oversikt over kva som faktisk har best effekt. Fylkeskommunen vil derfor støtte prosjekt som evaluerer eksisterande førebyggjande tiltak, og prosjekt som testar ut nye tekniske løysingar mot lakselus, seier Handegard.
Prosjekta må vere i samarbeid mellom oppdrettsnæringa og forskingsmiljø, og resultata skal kome heile næringa til gode.
Møteplassar og open debatt
Delar av midlane skal òg gå til å bygge felles kunnskapsgrunnlag og betre dialog mellom ulike aktørar. Fylkeskommunen vil arrangere møteplassar der forskarar, oppdrettarar, forvaltning og elveeigarar kan utveksle erfaringar og innsikt. Dette er viktig for å løyse utfordringane i fellesskap.
— Ein open debatt og samhandling som byggjer på forsking, dialog og tillit, der ein også får utfordra og bryna standpunkt, er avgjerande viktig for å komma vidare, understrekar Handegard.
Fylket har allereie fleire prosjekt på gang som skal kartleggje kva som påverkar villaks og sjøaure i fjordane. Desse vil få moglegheit til vidare støtte og oppfølging gjennom den nye satsinga.
Evaluering i 2026
Alle tiltaka skal evaluerast i 2026 for å finne ut om dei har hatt effekt. Målet er klart: Havbruk skal vera ei viktig framtidsnæring i Vestland som produserar sunn mat og byggjer lokalsamfunn, og samstundes skal ein sikre eit rikt liv i elvane i fylket.