Vestland fylkesting krev raskare behandling av energisøknader – tek gjerne jobben sjølv
Vestland fylkesting har på ny uttrykt bekymring over den lange behandlingstida for energisøknader i Noreg. Fylkesordførar Jon Askeland meiner dette hindrar oss i å nå energi- og klimamåla, og at det går utover næringsutviklinga i regionen.
Ved utgangen av 2024 var det 265 energisaker som ikkje var tildelt sakshandsamar i Norges vassdrags- og energidirektorat (NVE), 433 saker var under handsaming, og berre ei småkraftsak vart ferdighandsama i løpet av året.
– Eg er sterkt uroa over mangelen på nettkapasitet, og energiutbygging. Lang sakshandsamingstid er ei hovudutfordring. Kan fylkeskommunen ta konsesjonssakene på småkraft like godt som vi gjer det på oppdrettsanlegg?
Det sa Jon Askeland i sin opningstale til fylkestinget 18. og 19 mars. No er forslaget sendt både Energidepartementet, Stortingets energi- og miljøkomitè og stortingsrepresentantane i Vestland.
Regjeringa må la seg inspirere
– For akvakultursøknader har vi ei eiga forskrift for samordning og tidsfristar, slik at sakshandsamingstida frå mottak av søknad til endeleg vedtak ikkje skal ta meir enn 22 veker. Vi oppfordrar regjeringa til å la seg inspirere av denne forskrifta, og lage tilsvarande tidsfristar for energisøknader, der handsamingstida er uforholdsmessig lang. For vindkraft på land tek det i snitt over fem år å få ein ny konsesjon, medan det for store vasskraftanlegg tek over sju år. Nye, store kraftlinjer tek endå lengre tid, ofte meir enn åtte år. Vestland fylkesting meiner at Noreg og Vestland må ta grep for å behalda konkurransekrafta i næringslivet og kutta klimagassutslepp, seier Askeland.
Fylkestinget vedtok i møte 18. mars å be regjeringa vurdere følgjande tiltak:
- Overføra sakshandsaminga av nett-tilkopling til fylkeskommunen.
- Innføra tidsfristforskrifter i handsaminga av energisøknader.
- Overføra konsesjonshandsaminga av småkraftverk til fylkeskommunen.
Vestland har kompetansen
Når Vestland fylkesting no ber regjeringa vurdere å flytte ansvaret for sakshandsaminga av nett-tilkopling og småkraftsøknader til fylkeskommunane eller dei regionale NVE-kontora, er det meint som eit effektiviseringstiltak.
– Vestland står for om lag 25 prosent av all energiproduksjon i Noreg og har kompetansemiljø i denne type saker. Vi står klare til å ta unna søknadsbunken!, lovar fylkesordføraren.
Gå til sak PS 32/2025 Ei meir effektiv og desentralisert sakshandsaming av energisaker!