Nye stemmer i Vestland ungdomsutval – dette brenn dei for

Val til Vestland ungdomsutval vart vedteke på Fylkestinget 18. mars, etter at Fylkestinget for ungdom valte sine representantar. Vi har spurt dei nye ungdomspolitikarane våre to spørsmål. 

1. Kva saker brenn du for, og kvifor?
2. Du får vera fylkesordførar for ein dag, kva gjer du?
   
   
   

Malene Henden Fridtun (17) Gloppen

1. Eg brenn for skulen, fordi eg trur at ein god skule er grunnlaget for alt. For meg handlar det ikkje berre om fagleg kunnskap, men om å skape eit miljø der alle elevar kan føle seg trygge, motiverte og i stand til å utvikle seg både fagleg og personleg. I tillegg er eg opptatt av korleis vi planlegg for framtida, spesielt med tanke på ei berekraftig utvikling, sidan fylket vårt har store moglegheiter til dette.
   
   
2. Om eg fekk vere fylkesordførar for ein dag, ville eg prioritert å sjå på korleis vi kan styrke vidaregåande skular i Vestland. Eg ville tatt initiativ til eit møte med elevar, lærarar og skuleleiarar for å finne ut kva som fungerer og kva som ikkje gjer det. I tillegg ville eg utfordra politikarane i fylket til å forplikte seg til konkrete tiltak for betre skulemiljø og undervisningstilbod.
   
   

Isak Thommassen (17) Alver

1. Eg brenn for at alle skal bli inkludert, og at alle skal få moglegheit til å delta, fordi alle bør få dei same tilboda og moglegheitene. Eg brenn for at ungdommen skal få bli med å påverke korleis samfunnet vert styrt, fordi alle skal ha moglegheita til å føle seg sett.  
   
   
2. Først ville eg brukt moglegheita til å ta opp saker som kan vere relevant for ungdom. Deretter ville eg høyrt med ungdommane i fylket kva dei synest om sakene. Til slutt ville eg prøvd å endre på noko, dersom vi fann noko vi var ueinige om.
   
   

Ingeborg Wåge Møgster (16 år) Bergen

1. Eg brenn for at alle ungdommar skal ha moglegheit til å delta på eit fritidstilbod der dei kjenner seg sett og velkomne. Det er viktig at desse tilboda er varierte og inkluderande, slik at alle kan finna noko dei trivst med, uansett interesser, bakgrunn eller bustad. Eg meiner at ingen skal kjenna seg utanfor fordi dei ikkje har råd til å vere med, eller fordi det ikkje finst eit tilbod der dei bur. Fritidstilbod er ikkje berre ein måte å ha det kjekt på – det gir ungdom eit fellesskap, moglegheiter til å utvikla seg og ein plass å vere seg sjølv. Slike arenaer bidreg til å førebygge utanforskap og psykiske utfordringar. Difor meiner eg at dette er noko me må satsa meir på. 
   I tillegg brenn eg for at alle ungdommar skal ha tilgang til hjelp for livsmeistring og mental helse. Mange slit med stress, press og andre utfordringar i kvardagen, og det må vere låg terskel for å få støtte. Eg meiner det bør vere tilbod om dette på skulane eller i nærleiken av der ungdom bur, slik at det er lett å ta kontakt når ein treng det.
   
   
2. Som fylkesordførar for ein dag ville eg brukt tida mi på å sikra at alle ungdommar i fylket har eit trygt og inkluderande fritidstilbod. Eg ville sett av midlar til å oppretta fleire ungdomsklubbar, idrettstilbod og kulturaktivitetar – spesielt på mindre stadar der slike tilbod ofte manglar. 
   Eg ville også jobba for å styrkja tilgangen til mental helsehjelp for ungdom. Dette kan vere gjennom å oppretta fleire helsestasjonar for ungdom, samarbeida med skulane om å tilby samtaletilbod eller setja i gang prosjekt som fremjar god psykisk helse.
   
   

Marcus Askildsen (16) Askøy 

1. Eg brenn for fritidstilbod, spesielt ein lågterskel, open møteplass for ungdom, drive av ungdom. Det treng ikkje vere noko stort – berre ein stad der ungdom kan møtast, og der dørene alltid er opne. Kva som skal vere på møteplassen, må ungdommane bestemme sjølve. Eg kan ikkje vite kva alle ungdomar likar, så det er viktig at dei får seie kva dei ønskjer seg. 
   Møteplassar for ungdom er ei av hjartesakene mine. Eg trur slike stader kan hjelpe med mange av problema ungdom møter. Eg har sett korleis Raude Kors har drive ungdomsstyrte møteplassar der dei har hjelpt ungdom med rusproblem, sosiale utfordringar og kriminalitet. Dette er eit døme eg likar å bruke når eg snakkar om møteplassar, berre for å vise at det finst ein samanheng mellom kriminalitet, rus, mobbing og manglande tilhøyrsle.
   Vi treng møteplassar utanom mobil og idrett, der ungdom kan kjenne seg som ein del av eit fellesskap. Idrett er ein god stad for tilhøyrsle, men mange fell ut når dei blir eldre. Mobilen kan gi vennskap, men har òg mange negative sider. Ungdom sjølve ser dette, men kva skal dei gjere når det ikkje finst andre alternativ?
   
   
2. Eg ville opprette ei politisk sak om at alle kommunar skal opprette møteplassar for ungdom. Sjølv om det er økonomisk krise og eldrebølgje, trur eg det er billigare i lengda å satse på førebygging. Det kostar mindre å gi ungdom ein trygg plass enn å handtere følgjene av at dei fell ut av skulen eller hamnar i kriminelle miljø. Eg ville òg ha informert ungdom betre om kven som har ansvar for kva i fylket. Mange veit for lite om korleis politikk påverkar kvardagen deira. Difor ville eg ha besøkt så mange skular som mogleg, eller funne andre måtar å nå ut til ungdom på.
   
   

Nikolai Gjesdal (16) Sunnfjord

1. Heilt sidan eg var fem år gamal har eg hatt glede av å delta i idrett. Eg har hatt glede av å kjenne på meistring og samhald, men også motgang. Alt dette er viktig å oppleve i barndomen. Det dannar grunnlag for eigenskapar som er viktige  å ta med seg vidare i livet. Eg elskar idrett, og brenn difor for at alle skal ha eit fritidstilbod. Eg ønsker at alle skal ha moglegheita til å delta i idrett, til tross for økonomiske barrierar eller andre årsaker. Det treng ikkje alltid å handle om å score mål. Difor er det viktig at barn og unge har tilgang på lågterskel møteplassar.
   
   
2. Dersom eg fekk vera fylkesordførar for ein dag, ville eg brukt tida mi på å løfta fram og styrka fritidstilboda for barn og unge. Eg ville spesielt jobba for å gjera det enklare for alle å delta i idrett, uavhengig av økonomi, funksjonsevne eller bakgrunn. Eg ville sett i gang ei kartlegging av barrierar for deltaking i ulike kommunar, og arbeidd for å sikra støtteordningar som gjer at fleire kan vera med. Samtidig ville eg besøkt lokale møteplassar og idrettslag for å høyra kva dei treng, og korleis fylket kan bidra til meir inkluderande miljø.
   Eg ville også fremja samarbeid mellom skular, frivillige organisasjonar og idretten, for å skapa fleire lågterskeltilbod der det sosiale står i sentrum, ikkje berre prestasjon. Målet mitt som fylkesordførar for ein dag ville vore å legga eit grunnlag for eit fylke der alle barn og unge kjenner seg velkomne, verdifulle – og har ein plass å høyra til.
   
   

Carl Fossdal Tveit (15) Samnanger

1. Eg brenn aller sterkast for å motverke utanforskap blant ungdom. Dette er etter mi meining det viktigaste arbeidet samfunnet har føre seg. Eg brenn for dette, rett og slett fordi alle fortener å verte sett! Kva er vitsa i å drifte eit fylke som ikkje har plass til alle?
   
   
2. Om eg hadde vore fylkesordførar for ein dag, hadde eg først arbeidd med å få oversikt over planen for dagen. Etter dette hadde det vore kjekt å utforske korleis kvardagen for ein fylkesordførar er, og kva ansvar ein vert servert med. Akkurat kva arbeid eg hadde gjennomført er eg ikkje sikker på, men ein ting er visst: Eg skal bruke dagen min på å bli kjent med så mange som mogleg, samt lære mykje om rolla. Ein får ikkje gjort spesielt mykje arbeid på berre ein dag, men ein ting kan eg garantere; eg skal i alle fall kose meg!
   
   

Jakob Berger (18) Alver

1. Mi hjartesak er arbeid med psykisk helse. Eg vil jobbe for at ungdom i dag har god helse og føler seg god nok og elska. Mobbing og miljø er også tema eg brenn for, og trygge arenaer for ungdom der dei kan ytre seg og føle på meistring og tilhøyrsle. Eg vil og arbeide for at ungdomsråd og ungdom generelt skal få sikra stemma sin endå meir i Vestland ungdomsutval. 
   
   
2. Eg hadde starta dagen med å spreie positivitet, sendt ei melding på sosiale medium der eg gjer innbyggarane glade. Så ville eg reist rundt, møtt både unge og gamle og spurt om korleis dei har det og kva forbetringar som trengs. Eg ville høyrt med dei om de var engasjerte, og råda dei til å få fleire engasjert. Eg synest det er viktig å vise seg og lytta til innbyggjarane, og ta dei på alvor. 
   
   

Tord Hatteberg (18) Kvinnherad

1. Eg brenn for at alle unge skal ha ein fritidsaktivitet dei kan gå til, spesielt med tanke på minoritetar som treng fritidsaktivitetane til språklæring og bygging av eit sosialt nettverk. Eg meiner Vestland gjert lurt i å forske på og starte utbygging av kjernekraftverk fordi det er den mest miljøvenlege og ei sikker energikjelde for framtida. Eg brenn for at alle unge i Vestland skal ha eit tilstrekkeleg transporttilbod dei kan bruke til og frå vener, fritidsaktivitetar, skule og andre ting.
   
   
2. Eg ville først og fremst blitt kjent med varaordføraren og leiarane til dei ulike partia og utvala, slik at dei hugsar meg etter eg er ferdig med dagen som fylkesordførar. Så ville eg kalla inn til krisemøte i Fylkestinget og fått inn to tiltak: At alle unge i Vestland har rett på og skal få ein tilstrekkeleg, rimeleg og utfordrande fritidsaktivitet i løpet av neste budsjettplan. Det neste tiltaket ville vore at Vestland skal starte utbygging av eit kjernekraftverk som skal stå ferdig i 2050-2060. Noko meir trur eg ikkje at eg hadde fått tid til.
   
   

Hans Fredrik Moe (16) Luster

1. Eg synest kollektivtilbodet i fylket er utruleg viktig. Eg brenn for at alle skal ha moglegheit til å reise der dei vil, når dei vil, utan at det skal koste skjorta. Ungdomsbilletten er eit fantastisk tilbod me har i dag, men den kan utvidast. Det er ikkje rett å kalle det for ungdomsbillett når den ikkje eingong gjeld for ungdomsskuleelevar.
   
   
2. Hadde eg vore fylkesordførar for ein dag ville eg innført ei ordning for å gi elevar som går studiespesialisering moglegheit å reise på utplassering. Eg kjenner fleire som vel studiespesialisering fordi dei ikkje heilt veit kva dei ynskjer å bli. Ved å tilby dei utplasseringstid vil det kunne hjelpe dei med å finne noko som passar. Dei har også like mykje nytte av arbeidserfaring som dei ved yrkesfag, og derfor blir det feil at utplassering blir eit eksklusivt tilbod for yrkesfaglege linjer.
    

Jonas Aasen Engebø (16) Sogndal

1. Eg brenn for psykisk helse, kollektivtransport, utdanning og sommarjobb. Psykisk helse er viktig for å sikre at folk har det bra, både mentalt og fysisk, og eg meiner vi bør styrke tilbodet for å hjelpe fleire som slit. Kollektivtransport er også noko eg bryr meg om, fordi god transportinfrastruktur er viktig for at folk skal kunne reise effektivt og miljøvennleg. Utdanning er grunnlaget for ei god framtid, og eg vil jobbe for at alle skal få lik tilgang til god utdanning. Sommarjobb er også viktig for unge, då det gir både erfaring og økonomisk fridom.
   
   
2. Eg ville brukt tida mi på å styrke tilbodet for psykisk helse, spesielt for unge, og jobbe for betre støtte- og behandlingssystem. Eg ville også jobba for å auke investeringane i kollektivtransport, slik at fleire får tilgang til rask og miljøvennleg transport. Vidare ville eg arbeidd for å fremje utdanning og sørge for at alle får lik tilgang til gode læringsmoglegheiter. Eg ville også lagt til rette for fleire sommarjobbar for unge, slik at dei kan få verdifull arbeidserfaring.
   
   

Michelle Innvær (17) Bømlo

1. Eg brenn for den mentale helsa til spesielt ungdom og unge vaksne. Det er altfor mange der ute som slit, og som ikkje ser lyset i enden av tunellen. Eg vil at alle skal kunne ha tilgang til profesjonell hjelp om dei sjølv føler at dei treng det, og at ventelistene ikkje er så lange som dei er no. Eg brenn og for at kollektivtransporten skal bli betre, spesielt i distrikta. For dei som ikkje har lappen i distrikta, og ikkje har nokon som kan køyre seg rundt, er det vanskeleg å kome seg ut av huset og vere sosial. 
   
   

Dunya Sultan (15) Askøy

1. Ei av sakene eg brenn for, er betre tilrettelegging for ungdom i skulen. Mange elevar slit med stress og høge krav, og eg meiner det burde vere meir fokus på psykisk helse, praktisk læring og tilpassa undervisning.
   
   
2. Dersom eg fekk vere fylkesordførar for ein dag, ville eg brukt tida mi på å lytte til ungdommane i fylket og sjå kva utfordringar dei møter i kvardagen. Eg ville også jobba for fleire fritidstilbod, særleg for dei som ikkje driv med organisert idrett.
   
   

Dette gjer Vestland ungdomsutval 

Vestland ungdomsutval (VU) er arbeidsutvalet til fylkesting for ungdom (FFU) i Vestland fylkeskommune. VU følgjer opp vedtak gjort av FFU og rapporterer til FFU.  

VU skal bestå av ni medlemer, inkludert leiar og nestleiar. Desse vert valt på fylkesting for ungdom. Det skal òg veljast fem varamedlemer. Fire av medlemene skal veljast for to år. Dei fem resterande medlemane, i likskap med vara, har ein valperiode på eitt år.  

Vestland ungdomsutval fastset eigen møteplan. I utgangspunktet skal dei ha seks ordinære møter i året, i tillegg til nettverkssamling for ungdomsråd og fylkesting for ungdom. 

• Gi uttale til forslag til økonomiplan og årsbudsjett 
• Gi uttale til regionale planar som angår ungdom 
• Gi uttale til saker som andre fylkeskommunale organ legg fram 
• Gi råd i alle saker som gjeld levevilkår for ungdom knytt til fylkeskommunal verksemd 
• Arbeide for å utvikle eigen organisasjon og verksemd

Neste møte i Vestland ungdomsutval er 22. april. Då skal det og veljast leiar og nestleiar for det ferske utvalet.

Oversikt over medlemmar og møte i Vestland ungdomsutval.

Les meir om fylkesting for ungdom og Vestland ungdomsutval Her finn du og protokoll frå fylkesting for ungdom, og planprogrammet som blei vedtatt der.

Til pressefoto av Vestland ungdomsutval