Nora (17) møtte kronprinsen på De unges havdag
Jobbmoglegheitene innan havnæringa er mange, og på "De unges havdag" fekk nær 1000 skuleelevar møte verksemder som lever av og på havet. Nokre fekk til og med helse på H.K.H. Kronprins Haakon.
Ei av dei var Nora Dræge (17), som går første året på restaurant og matfag ved Sotra vidaregåande skule.
– Det var veldig kjekt å møte kronprins Haakon, sjølv om eg var litt nervøs i starten. Men han stilte mange gøye spørsmål, seier Dræge.
Ho ønsker seg jobb offshore på båt eller plattform, med jobb på landfast restaurant som plan b.
– Det er ein veldig kreativ jobb, og eit godt miljø å vere i, der alle er ven med alle, fortel Dræge.
– Eg elskar havet
H.K.H. Kronprins Haakon var i Bergen for å delta på One Ocean Week og toppmøtet One Ocean Summit i Håkonshallen måndag.
– Eg må innrømme – eg elskar havet. Eg elskar å vere på det, og å vere i det. Og her i Bergen var eg i Marinen og lærte korleis ein navigerer på det. Men sjølv om vi elskar havet, veit vi at havet ikkje er i god helse, og vi må få havet tilbake i balanse, sa Kronprins Haakon ved opninga av One Ocean Summit.
Snakka med elevar og verksemder
Kronprinsen møtte også One Ocean Youth Panel på Statsraad Lehmkuhl, før han gjekk over til Festningskaien for å møte elevar og verksemder som deltok på De unges havdag. Arrangementet er nytt i år, og tilrettelagt for elevar på ungdomsskular og vidaregåande skular. Nær 1000 elevar nytta seg av tilbodet, og ti av våre vidaregåande skular var til stades. Langs heile Festningskaien var det utstillingar og demonstrasjonar av teknologiske nyvinningar frå verksemder i regionen og forskingsmiljø. Her vart elevane kjende med lokale rederi, dei fekk lære om framtidas energiløysingar, besøke sjømatteltet, møte Sjøforsvaret og bli kjend med oppdrettsnæringa og mykje meir.
Fekk testa fysikken
Forsvaret treng fleire folk, og var godt synleg på Festningskaien. Sondre, sesjonsspesialist på Sverresborg og Maya, tilsett ved forsvarets personell- og vernepliktssenter på Hamar, opplever at interessa er stor. Dei nytta anledninga til å fortelje om dei ulike moglegheitene i Forsvaret, både under førstegangstenesta og vidare som yrkeskarriere.
– Det er uante moglegheiter! slår dei fast.
Sjøførsvarets idretts- og treningssenter stilte med ulike fysiske testar som elevane kunne prøve seg på. Hanna Aabrekk Sørensen (16) går på toppidrett ved Åsane vidaregåande skule. Ho greidde lett pull-ups-krava til Forsvaret, og fortel at ho har bestemt se for å søke seg inn til førstegangsteneste, fordi det er kult!
Arbeidsstad under vatn?
Også Ubåttjenesten var representert på havdagen.
– Vi treng alltid folk, spesielt no som vi får nye ubåtar. Difor er vi til stades på ein del yrkesmesser, men det er spesielt givande for oss å delta på arrangement som De unges havdag. Det har vore eit par elevar som har sagt at dei har lyst til å jobbe på ubåt. Då kan det vere lurt under intervjurunden som vernepliktig å formidle dette. Men du må vite kva du seier ja til. Det er fleire veker under vatn, og det er ikkje sengeplassar nok til alle på grunn av skiftordninga, seier våpenteknikaren ved Ubåttjenesten.
Er ein del av One Ocean Week
De unges havdag er ein del av One Ocean Week, som er ein møteplass for debatt, erfaringsutveksling og opplevingar knytt til ei berekraftig utnytting av havet. Veka blir arrangert for tredje gong, og mobiliserer både næringsliv, akademia, det offentlege og innbyggjarar i Bergen og Vestland. I tillegg til eit rikt fagleg innhald, er veka fylt med ei rekkje arrangement som er opne for alle.
One Ocean Week er støtta av Bergen kommune og Vestland fylkeskommune, og er eit samarbeid mellom One Ocean Havbyen Bergen og nesten 80 partnarar.
