Fylkesordføraren hyllar yrkesfaga: – Dette gir oss trua på framtida

Yrkesfag er i vinden som aldri før, med rekordhøge søkjartal i Vestland. Det gir ein ekstra dimensjon til yrkes-NM.

– Dette er Noregs største møteplass for yrkesfagleg stoltheit og kompetanse – og vi er veldig glade for å få vere vertskap i år. Det handlar om meir enn å konkurrere. Det handlar om å utvikle seg fagleg, teste grenser, lære under press og ikkje minst handlar det om å inspirere andre, seier fylkesordførar Jon Askeland.

NM og utdanningsmesse

Side om side med yrkes-NM arrangerer Vestland fylkeskommune utdanningsmesse for elevar på ungdomsskular og vidaregåande skular. Det er mykje folk på Øyrane denne veka, arrangørane ventar at om lag 10 000 menneske tek turen innom. Dei håpar på 12 000.

Det er ein jamn straum av ungdomar og bussar mellom Førde vidaregåande skule og Campus Verftet, for det er på desse to plassane det skjer. Det er konkurransar, yrkesfagtesting, ulike simulatorar, twist, føredrag og kulturinnslag i skjønn foreining.

Konkurrerer side om side

På Campus Verftet er det sett opp to store telt, der utdanningsmessa og yrkes-NM er tett samanvevd. Her er standar for vidaregåande skular, fagskulen, høgskulen, ein folkehøgskule, ulike opplæringskontor, bedrifter og andre.

Og innimellom konkurrerer lærlingane. I eine enden av det eine teltet jobbar lærlingane i anleggsgartnarfaget med sand, stein, busker og tre. I eit anna rom jobbar tømrarlærlingar med å byggje kvar sin bod. Ved sidan av, to meter unna, er det betongfaget det blir konkurrert i. Utanfor konkurrerer lærlingane i maskinførarfaget, persontransportfaget og yrkessjåførfaget.

– Det er utruleg spennande å sjå korleis dei ulike lærlingane løyser oppgåvene sine. Eg ser dei har ulike strategiar for å løyse den same oppgåva, så det blir interessant å sjå endeleg resultat, og korleis dei kjem ut med tanke på tida, seier fylkesordføraren.

Rekordsøking til yrkesfaga  

Målet med utdanningsmessa er å promotere yrkesfaga, å gje ungdom høve til å prøve seg som blekkslagarar, anleggsarbeidarar og energimontørar. På fleire av standane er det simulatorar, og det er mange og flinke fagfolk på plass for å syne fram faga sine.

Vestland er fylket med høgast søking til yrkesfag neste skuleår. 60,3 prosent av ungdomane som har skuleplass på vg1, har yrkesfagleg utdanningsprogram som primærønske. Det er fleire enn nokon gong.

– Framtida vil krevje mykje av oss. Vi treng fleire som byggjer, reparerer, pleier, lagar, installerer og skapar – med både hovudet og hjarta. Den kompetansen ser vi her i dag, hjå dei dyktige utøvarane i yrkes-NM. Og det gir oss tru på framtida, seier Askeland.

Fekk teste stolpesko

Sjølv skal han ikkje velje yrkesveg, men fekk likevel teste ein gamal draum. Fylkesordføraren fekk på seg stolpesko og verneutstyr og fekk prøve å klatre.

– Dette har eg alltid hatt lyst til. Sterkstraum-faget har eg ekstrem stor respekt for. Dette er folk som må ut i storm og torevêr for å sikre at vi andre har varme og straum til pc-ane våre, seier Askeland.

– For den minste ting

Blant ungdomar, fagarbeidarar, lærlingar, lærarar og andre er også elev- og lærlingombod, Peder Bugge, på plass med eigen stand.

– Dette er ein flott arena for å vere synleg. Vi ønskjer å nå ut til flest mogleg elevar og lærlingar for å informere både om at vi finst, og om kva vi kan hjelpe dei med. Her treffer vi nettverka våre – opplæringskontora, rettleiingstenesta, bedrifter og andre – og får utvida og styrka dei. Vi omboda er oljen i maskineria, vi smører nava, slår han fast.

Han er eitt av to elev- og lærlingombod i Vestland. Saman med Ann Kristin Hauge jobbar han for at elevar, lærlingar og lærekandidatar får oppfylt rettane sine i skule eller på arbeidsplassen.

– Hovudbodskapen min er at vi her for den minste ting. Det skal vere veldig låg terskel for å ta kontakt med oss, seier Bugge.

Handlar om å ta val

På nabostanden står karriererettleiar Siv Kristin Flekke i Karriere Vestland, eit tilbod til vaksne over 19 år, altså ikkje til dei som skal velje retning for vidaregåande. Likevel meiner ho dette er ein viktig arena å vere på.

– Alt handlar om å ta val. Eg håpar å treffe ein del foreldre og lærarar og få snakke med dei. Det er også interessant å snakke med elevar på ungdomsskulen, og høyre korleis dei tenkjer. Bodskapen min er at det er viktig for unge å ta eigne val, seier ho.

Ungdomar frå ulike stadar i fylket blir bussa inn til utdanningsmessa og yrkes-NM i Førde denne veka, og mange reiser nok derifrå med ein overdose informasjon. Her møter dei tilsette på vidaregåande skular som presenterer dei ulike utdanningsprogramma der. Fagskulen Vestland er på plass for å syne fram kva utdanningsmoglegheiter dei tilbyr. Her er opplæringskontora for mange fag, det nasjonale senteret for yrkesfag og mange andre.

Innimellom konkurrerer altså lærlingane, og det gjer dei fram til torsdag, då oppgåvene skal vere ferdige, og arrangementet blir avslutta med medaljeseremoni på Scandic Sunnfjord Hotel.