Fleire droppar refleks

Ein ekstra farleg kombinasjon med snølause vintrar er regn som gir glatt, mørk og våt veg. Mørke vinterkle gjer det heller ikkje enklare å bli oppdaga. Om vinteren blir langt fleire påkøyrd enn om sommaren.

— Går du utan refleks krev det at bilførarar må vere ekstra merksam, spesielt når dei nærmar seg gangfelt. Du må altså stole på at bilførar ser deg når du går utan refleks. Den sjansen tar ikkje eg, seier Arve Helle, leiar av trafikktryggingsutvalet i Vestland fylkeskommune.

Refleksdagen

Tal frå Trygg trafikk viser at refleksbruken på landsbasis har gått ned frå 48 prosent til 47 prosent. I Vestland seier 48 prosent at dei brukar refleks.

Helle, i lag med representantane i trafikktryggingsutvalet og Trygg trafikk, markerer refleksdagen 16. oktober med å dele ut refleksar, og gjere folk meir bevisst på kor viktig det er å vere synleg i trafikken.

— Utan refleks er du synleg først på rundt 25-30 meters hold, det vil seie at bilførar har to sekund på å reagere. Med refleks kan bilførar sjå deg på 140 meters hold med nærlys, og har rundt ti sekund. Dei sekunda kan utgjere forskjell på liv og død, seier Helle.

Falsk tryggleik

Om hausten blir det tidleg mørkt morgon og kveld. Krevjande køyreforhold med regn og våt veg gjer at veglys blir «slukt». Gatelys kan også gi falsk tryggleik. Dei fleste ulykkene skjer i byane og når folk kryssar gata. Lys frå andre bilar og refleksjonar frå butikkvindauga gjer det vanskeleg å oppdage gåande.

— Gåande og syklande er vanskeleg å oppdage i mørket, og dei er mykje dårlegare beskytta enn bilførar viss det skjer ei ulykke, seier Helle.

Helle har fleire konkrete tips:

• Bruk to refleksar så er du synleg frå alle kantar.
• Nærlys på bilar skrår nedover, så det kan vere smart å bruke refleks på beina eller i knehøgde.
• Legg refleksbånd i skoa, då hugsar du dei på veg ut.
• Bruk refleks som beveger seg når du går, då er du mest synleg.
• Fest refleks på alle jakker og bagger.