Lyser ut 17 millionar til berekraftig verdiskaping i Vestland

Fylkeskommunen vil gi støtte til å gjennomføre større og mindre utviklingsprosjekt i Vestland. Søknadsfristen er 19. juni. 

Kven får støtte?

Tilskotsordninga er retta mot kommunar, næringsaktørar, kunnskapsmiljø og andre utviklingsaktørar i Vestland. Bedrifter kan ikkje søkje aleine.
 
– Vi prioriterer utviklingsprosjekt som kan bidra til verdiskaping i Vestland gjennom berekraftig bruk av naturressursar, grøn næringsutvikling og innovasjon. Dette skal vere med å bidra til at Vestland blir det leiande verdiskapingsfylket, seier Klakegg. 

Fire satsingar

Prosjekta skal også bidra til å nå måla for minst ei av dei fire satsingane i planen «Berekraftig  verdiskaping – regional plan for innovasjon og næringsutvikling, som gjeld for perioden 2021-2033:

Grøn næringsutvikling

Denne satsinga har eit næringsliv med netto nullutslepp som mål. Prosjekt som handlar om sirkulærøkonomi, energi, auka eksport frå fastlandsnæringar og heilårsarbeidsplassar i reiselivsnæringane er spesielt etterspurde.

Areal til næringsutvikling

I denne satsinga er målet rett areal til rett føremål til rett tid. Prosjekt skal spesielt bidra til at Vestland har tilgang til nok eigna næringsareal som er basert på berekraftig bruk av naturressursar. Fylkeskommunen etterspør her samarbeid for å utvikle smartare og meir berekraftig bruk av areal i ein bu- og arbeidsmarknadsregion. Det kan gjelde på land og i sjø.

Innovative og inkluderande samfunn

I denne satsinga er målet verdiskaping og grøne arbeidsplassar i heile fylket. Her opnar fylkeskommunen for prosjekt knytt berekraftige bu- og arbeidsmarknadsregionar med like moglegheiter til å delta i verdiskaping. Fylkeskommunen etterspør spesielt prosjekt som kan styrke kommunane sitt arbeid med verdiskaping og sysselsetting, og prosjekt som kan bidra til å inkludere fleire i arbeidslivet

Kompetanseutvikling i arbeidslivet

Fleire arbeidstakarar med rett kompetanse er målet i denne satsinga. Her ønskjer ein spesielt prosjekt som bidreg til utvikling av kompetansehevings- og utdanningstilbod etterspurt av arbeidslivet, mobilisering til auka bruk av slike tilbod, og ulike strategiske samarbeid knytt til rekruttering av rett arbeidskraft.

Aktiv deltaking

Søkarane må gjere greie for påverknad på klima og miljø i søknaden. Mindre prosjekt som typisk varer inntil eitt år får som regel mellom to og fem hundre tusen kroner i støtte. Større prosjekt kan vare inntil tre år og kan få meir støtte.
 
I år stilles det sterkare krav til at samarbeidspartnarane i prosjekta deltek aktivt i gjennomføringa av prosjekta og bidreg med finansiering. Det er krav om at minst 50 prosent av finansieringa i prosjekta kjem frå andre kjelder enn fylkeskommunen, anten i form av eigen innsats, eigne midlar eller midlar frå andre.

Alle som planlegg å søke blir oppmoda til å delta på digitalt informasjonsmøte 16. mai eller 5. juni.