Inntaket klart: Opprettar fire nye klassar
Alle med ungdomsrett som har søkt skuleplass på vidaregåande skular i Vestland har no fått svar på vigo.no etter 3. og med det siste inntaksrunde. Vestland fylkeskommune opprettar i år fire nye klassar.
Fylkeskommunen har i år registrert og behandla over 22 000 søknader til dei offentlege vidaregåande skulane i fylket. Nesten 20 000 søkjarar er tatt inn på ulike tilbod. Alle søkjarar med ungdomsrett har fått eit tilbod som er i tråd med søknaden, og til eit tilbod dei har rett til.
82 prosent av alle søkjarar har, i tredje inntaksrunde, fått tilbod om den skuleplassen dei helst ville ha. I fjor var dette talet 83 prosent. Dei som har fått tilbod i Vigo takkar ja med å møte på skulen til skulestart.
Fire nye klassar
Det er i år oppretta fire klassar i løpet av inntaket. Dette har gjort at fleire søkjarar har fått eit tilbod dei har ynskja seg.
Dei fire klassane er alle på Vg1 og fordel seg slik på skule og utdanningsprogram:
| Askøy vgs | To klasser bygg- og anleggsteknikk |
| Olsvikåsen vgs | Ein klasse studiespesialiserande |
| Sandsli vgs | Ein klasse sal, service og reiseliv |
Det har i år vore stor etterspurnad etter skuleplass i inntaksområdet kring Bergen. Behovet har vore størst innan yrkesfaga.
Denne justeringa er gjort etter administrativ fullmakt. Etter justeringa har alle søkjarar med ungdomsrett på Vg1 fått eit tilbod innanfor inntaksområdet sitt.
Møt fram til skulestart
Det er viktig at alle elevar møter på skulen til skulestart der dei har fått tilbod om skuleplass. Elevar som ikkje møter opp, mistar tilbodet, og plassen går vidare til andre søkjarar. Informasjon om skulestart får elevane frå skulen. Oppdatert informasjon om skulestart vil vere tilgjengeleg på nettsidene til skulane.
Her er liste over ledige plasser ved dei vidaregåande skulane (PDF)
Elevar som ønskjer plass på tilbod som er ledige, kan ta kontakt med den skulen dei ønskjer å gå på.
Informasjon om skulestart
Dei vidaregåande skulane legg ut informasjon om skulestart på nettsidene sine.
Oversikt over poenggrenser ved inntak til vidaregåande skular
Oversikta viser poengsummen til sist innteke elev med ungdomsrett. Tala er henta ut etter 3. inntaksomgang i det ordinære inntaket.
Der det står «Alle» under nedre poenggrense har alle søkjarar med ungdomsrett fått tilbod.
Ved enkelte programområde vert det gitt tilleggspoeng som kan inngå i poengutrekninga. Dette gjeld for Vg1 Idrettsfag og Vg1 musikk, dans og drama.