Askøybrua får naudsynt vedlikehald

– Askøybrua er einaste vegsambandet mellom Askøy og fastlandet og trafikken er stor. Brua representerer dessutan store verdiar som må vedlikehaldast for å sikra brua ei levetid på 100 år. Derfor prioriterer vi no naudsynt og kritisk vedlikehald for at den skal tole påkjenningane som vèr, vind og trafikk utsett den for, seier fylkesordførar Jon Askeland.

Hengestagsfeste må byttast ut

Det er hovudkabelen og dei øvre hengestagsfesta som treng kritisk vedlikehald. Hengestengene er festa til hovudkabelen på Askøybrua med forbindingar som tidlegare ikkje var nytta på hengebruer da brua vart bygd i 1992.

I etterkant er det påvist at denne typen forbindingar er utsett for utmattingsbrot over tid. Om dei øvre hengstagsfesta på Askøybrua ikkje vert skifta ut i nær framtid aukar moglegheiten for utmattingsbrot før eller seinare, og ombygging og utskifting er sterkt tilrådd.

To prosjekt under eitt

Forutan hengestagsfesta er hovudkablane den mest kritiske delen av brukonstruksjonen. Hovudkablane kan ikkje skiftast ut, og treng jamleg overflatevedlikehald.

– No kan vi slå saman desse to naudsynte vedlikehaldsprosjekta, noko som er meir effektivt og gjev mindre kostnadar enn to einskilde prosjekt, seier Askeland.

Askøybrua var Skandinavias lengste hengebru med 1057 meter då den vart bygd, og har eit hovudspenn på 850 meter.

Minimale konsekvensar for trafikken

Fylkeskommunen legg no opp til å signere kontrakt for arbeidet i løpet av mars i år slik at  arbeidet kan ta til i mai. Arbeidet vil skje i høgda og ikkje i køyrebana, men nokre arbeidsoperasjonar vil kreve innsnevra vegbane og kortare stengingar på nattestid.

Askøybrua har høg trafikkmengd, i snitt passerer om lag 21 000 køyretøy brua kvar dag, og alle arbeidsoperasjonar vil bli tilpassa trafikken for å gje minst mogleg konsekvensar.