ONS 2022: Opna eigen paviljong for Vestland
– Vi er inne i ei tid med store utfordringar, men også enorme moglegheiter når det gjeld å bygge ein ny grøn økonomi. Vestland er ein drivar i nasjonal samanheng i denne viktige omstillinga, seier fylkesordførar Jon Askeland.
I dag opna han Vestland sin paviljong på ONS 2022 i Stavanger der bedrifter frå heile fylket har stand. Messa ONS 2022 er ein av verdas største møteplassar for den internasjonale energibransjen.
– Må bygge vidare på det vi er gode på
Askeland understrekar at det viktig å bygge vidare på kulturen og erfaringane vi har frå norsk sokkel for å lukkast med den grøne omstillinga. Dette gjeld for eksempel å bygge ut havvind som ny energikjelde.
– At fylkeskommunen oppfyller rolla si med å utdanne fagarbeidarar for morgondagen er også ein føresetnad for å lukkast, seier Askeland, som gler seg over at årets messe fokuserer på moglegheitene i det grøne skiftet.
Legg til rette for bedrifter
Det er Vestland fylkeskommune som har organisert arbeidet med å etablere paviljongen for bedrifter i fylket.
– På denne måten har vi lagt til rette for at fleire viktige bedrifter i Vestland kan få presentert seg på ONS 2022. Vi sikrar dermed at ulike bedrifter i fylket får delta på ein enkel måte, utan at dei må gjere alt arbeidet med logistikk og planlegging på eiga hand, seier Bård Sandal, avdelingsdirektør for innovasjon og næringsutvikling.
Grøn region Vestland
Ein av standane på vestlandspaviljongen tilhøyrer prosjektet Grøn region Vestland, eit samarbeidsprosjekt mellom Vestland fylkeskommune og Innovasjon Norge. Med seg i bagasjen har dei historia om 16 grøne hubar som går i front for eit næringsliv i Vestland på full fart inn i det grøne skiftet. Dei grøne hubane utgjer avgrensa geografiske område der tilhøva ligg særs godt til rette for grøn næringsutvikling. For å realisere potensialet i desse hubane er ein avhengig av godt samarbeid på tvers av næringar og mellom ei rekke ulike aktørar.
På Vestland sitt område finn du bedrifter frå heile fylket, mellom anna ClampOn, Invest in Bergen, Boliden, Prowell Plan, FjordBase Florø, Wergeland Group, LOS Gruppen AS, Bergen Maritime Group, ENERIN AS, Nordfjord Hamn, Kranproffen AS, Transmark Subsea AS