Elevar frå Vestland får gratis utdanning i Tyskland
– Vi set pris på at vi kan ha dette samarbeidet med Tyskland og at dei tek imot våre elevar, seier fylkesordførar Jon Askeland. Den nye samarbeidsavtalen om utveksling vart underskriven då representantar for skulestyresmaktene i Erfurt var på besøk i Bergen.
– Målet vårt er at elevar i Vestland skal få høve til å ta utdanning i utlandet. I dag har vi avtalar med skular i fire land, Frankrike, Storbritannia, USA og Tyskland. Vi ser at elevane våre trivst godt og har stort utbyte av opphalda. Dei får interkulturell kompetanse og kjem attende med nye impulsar, kultur og lærdom, seier fylkesordførar Jon Askeland.
Svært godt samarbeid
Avdelingsdirektør for opplæring og kompetanse, Bjørn Lyngedal, ivrar også for internasjonalt samarbeid. Samarbeidet med Tyskland starta i Hordaland i 2008.
– Samarbeidet med Tyskland har fungert svært bra. Gjennom desse 14 åra har vi fått ganske tette band. Tyskland er god på utdanning, og elevane får oppleve det tyske utdanningssystemet. Det styrkar samarbeidet med Tyskland. Elevane får ein ekstra dimensjon med seg og personleg vekst. Dei lærer språk og kultur og får kompetanse dei ikkje kunne fått her i landet, seier avdelingsdirektør Bjørn Lyngedal.
14 nye elevar til Tyskland
Elevane, som skal få utdanning i Erfurt i regionen Thüringen i Tyskland komande skuleår, er tatt ut. Alle elevar innanfor studiespesialisering og elektro i Vestland kan søkje.
– Vi kan sende inntil ni elevar på kvart fagfelt. Elevane søkjer gjennom inntaksystemet vårt. I tillegg må dei legge ved eit motivasjonsbrev. Deretter blir dei kalla inn til intervju. Til det nye skuleåret har vi tatt ut ni elevar på elektrofag og fem elevar på studiespesialisering, seier Berit Roksvåg og Lene Fjeldsbø som er ansvarlege for internasjonalisering på opplæringsavdelinga.
Styrke næringssamarbeid
– Vi var interessert i å ha eit slikt samarbeid, og det var Erfurt også. Regionen Thüringen er sterk på industri, og vi ville styrke næringssamarbeidet med Tyskland. Først ut var elektrofag. Etter kvart kom studiespesialisering med. Samarbeidsavtalen er no vidareført i Vestland. I tillegg til elektrofag og studiespesialisering, arbeider vi for å utvide avtalen og inkludere utveksling av apotekteknikarar, seier Roksvåg.
Askøy vidaregåande skule har administrert utvekslinga med Tyskland. Eit mogleg samarbeid om utveksling av apotekteknikarar vart diskutert med rektor og avdelingsleiar på Åsane vidaregåande skule under besøket på skulen.
– Går det i orden, kan tyske apotekteknikarane kome hit, og vi kan sende apotekteknikarar til Erfurt.
Intensivkurs i tysk
Elevane på studiespesialisering går heile vg2-året i Tyskland, mens elektroelevane har eit intensivkurs i tysk før dei reiser til Erfurt i slutten av oktober. Askøy vidaregåande skule har og tatt i mot elevar og lærarar frå Erfurt på kortare opphald over eit par veker. Då får dei mellom anna utplassering i bedrifter.
– Elevane på elektrofag gjennomfører skuleåret og tysk eksamen på ein svært god måte. Mange av elevane kan ikkje tysk på førehand. Vi har vore til stades under eksamensslutt og diplomutdeling i rådhuset i Erfurt ved skuleslutt der dei norske elevane held tale på tysk. Det er imponerande å oppleve dette, seier Fjeldsbø.
Ettertrakta på jobbmarknaden
Vel heime skal elevane ut i lære.
– Mange av dei har alt fått læreplass før dei er tilbake. Dei er veldig ettertrakta på jobbmarknaden her heime og får lett læreplass. Dei får ei anna erfaring enn her heime. Dei blir meir sjølvstendige. Den første kvinnelege eleven i elektrofag i Erfurt var frå Hordaland. Det vekte oppsikt då vi sende dei første kvinnene dit, men dei vart godt tekne imot og har bidrege positivt til læremiljøet på skulen, seier Roksvåg.
Gratis opphald og reise
Utdanninga og opphaldet i Tyskland er gratis.
– Elevane får støtte frå Lånekassen til opphaldet og reisestipend til reisa. Til no har elevane budd på internat. Vi jobbar for at elevane skal få bu hos vertsfamilie i helgane, slik at dei kan bli meir kjende med det sosiale livet og kulturen i Tyskland. Den tyske delegasjonen skal jobbe vidare med dette, seier Fjeldsbø.
Under opphaldet i Bergen deltok den tyske delegasjonen på foreldremøte med dei nye elevane som skal til Tyskland. Under eit møte på Amalie Skram videregående skole vart den nye avtalen signert av partane og den vidare utviklinga i samarbeidet vart diskutert. Delegasjonen har også møtt Bergen kommune og helsebyråd Beate Husa der tema var pandemihandtering.