– Har alltid visst at eg ville bli frisør
– Det er veldig kjekt, eg har fått fast jobb og tener bra, seier Silje-Kristin Fondevik Iversen. Torsdag kveld fekk den nybakte frisøren utdelt sveinebrev under ein høgtideleg seremoni i Håkonshallen i Bergen.
Sveinegildet vart skipa til av Bergen Næringsråd, Opplæringskontora og Vestland fylkeskommune. Sveinegildet har lange og historiske tradisjonar i Bergen, men seremonien i vår tid er ei forenkla utgåve. Over 200 kandidatar i 41 ulike fag fekk utdelt sveine- eller fagbrev. Frisørfaget var mellom dei største med 16 kandidatar.
– Eg har tatt utdanninga på Årstad videregående skole og gått læretida hos Ramsvik frisør på Vestkanten. 12. august tok eg sveinebrevet og fekk fast jobb hos Ramsvik, seier Silje-Kristin Fondevik Iversen.
Kjekt yrke
Val av yrke var lett for ho.
– Eg var heilt sikker, eg har alltid visst at eg ville bli frisør. Yrket synest eg er veldig kjekt. Eg har mange greie kundar og 14 kjekke kollegaer. Vi har eit veldig godt miljø. Eg kan tilrå alle å bli frisør, seier Silje-Kristin Fondevik Iversen som fekk utdelt sveinebrevet av Ann-Kristin Kristoffersen som er leiar av yrkesopplæringsnemnda i fylket.
Største fag
Det største faget på utdelinga var tømrarfaget med 33 kandidatar. Sunniva Bjørvik er ein av kandidatane.
– Eg gjekk på Laksevåg vidaregåande skule. Studiespesialisering hadde eg ikkje lyst å ta, så eg tenkte på tømraryrket. Eg har vore med farfaren min som er tømrar, og eg likar fysisk arbeid. Og så kan eg bygge mitt eige hus, seier Sunniva Bjørvik.
På hummerfiske
I matrosfaget var det fem kandidatar. Ein av dei er Cora Hjelme. Ho har gått på Sotra og Bergen maritime vidaregåande skular.
– Eg likar sjøen og havet og har vore med far min på hummerfiske. Så valde ein kompis av meg matrosfaget, og eg herma. Eg fekk læreplass ganske lett, og det skal vere lett å få jobb, men dette skuleåret har eg vald å ta påbygg. Eg tenker framleis på kva eg skal gjere på og synest det er vanskeleg val. Difor går eg på påbygg. Så får eg sjå til sommaren, når skuleåret er omme, kva eg gjer vidare, seier Cora Hjelme.
Ikkje lett å velje yrke
Sunniva Bjørvik og Cora Hjelme gjekk i same klasse på Fjell ungdomsskule. Når går dei i same klasse igjen, no på Sotra vidaregåande skule for å få studiekompetanse.
– Dette skuleåret er det første gongen Sotra vgs har oppretta påbygg, vg4, for kandidatar med fag- og sveinebrev. Det er ikkje lett å velje yrke, men eg tenker på å studere innan berekraftig utvikling innan tømrarfaget. Til våren skal eg vurdere kvar vegen går vidare, seier Sunniva Bjørvik.
Verdifulle
Fylkesordførar Jon Askeland helsa kandidatane.
– Eg er stolt av dykk. De har valt den rette utdanninga og etterutdanninga. Dette er starten på neste fase i yrkeslivet, å nytte kunnskapen og ferdigheitane som fagarbeidar. Å skape framtida di vidare i arbeidslivet og tene pengar. De har møtt og vil møte ei verd og jobbsituasjon der endring og omstilling blir det vanlege. Då er de veldig verdifulle, for det du kan, kan alltid byggjast vidare på, og med dine eigne menneskelege eigenskapar, så har du grunnsteinen i jobblivet ditt for det du vel vidare.
Fagutdanning i vaksen alder
Fylkesordføraren hadde også ei spesiell helsing.
– Mange av dykk som er her i dag, har tatt fag- eller sveinebrev i vaksen alder. Det står stor respekt av, etter mange år, å satse som ufaglært, og gjennomføre både eksamen og den praktiske prøva, i tillegg til jobb og familieliv, sa fylkesordførar Jon Askeland.
Sveinegildet vart leia av Inge Bauge som er oldgesell og leiar av Byggmestrenes Servicekontor AS. Med septer i handa leia han prosesjonen av alle kandidatane inn og ut av Håkonshallen. Fire skutelssveiner, frå Slåtthaug videregående skule, bar ein «lade», ein slag kasse der alle fag- og sveinebreva låg oppi, etterfølgt av oldermennene. Dei er leiarar av sine faglege laug og foreiningar.