Stipend og heider til idrettsutøvarar
– Vi er takknemlege for treninga og innsatsen de legg ned og idrettsgleda de gjev oss kvar bidige dag, seier fylkesordførar Jon Askeland. På fylkestinget i går delte han ut utviklingsstipend til sju unge utøvarar frå fylket og heidra ni utøvarar for framifrå innsats.
Utdelinga på fylkestinget var digital. Sju utøvarar fekk kvar sitt utviklingsstipend på 40 000 kroner.
– Dette er andre gongen Vestland fylkeskommune tildeler utviklingsstipend til unge idrettsutøvarar frå klubbar i Vestland. Historisk har Hordaland fylkeskommune tildelt dette stipendet heilt sidan 1996. I år fekk vi 62 søknader frå 23 kvinner og 39 menn. Dei representerer 27 ulike idrettar. Stipendet skal støtte den einskilde i utøving av idretten og den vidare utviklinga. Tildelinga er gjort i samråd med Olympiatoppen Vest, seier fylkesordførar Jon Askeland.
Utviklingsstipend
Desse sju fekk fylkeskommunalt utviklingsstipend
Einar Bjørvik, 18 år roing, Fana roklubb
Julie Dicko Erichsen, 20 år turn apparat, Laksevåg turn og idrettslag og Fana-Laksevåg turnforening
Markus Mogstad Barth, 21 år badminton, Bergen badmintonklubb
Bård Bjørnevik Skogen, 20 år golf, Haugaland golfklubb
Julia Jordanger Loen, 19 år vektløfting, Breimsbygda IL
Sindre Sætren Myklebust, 19 år alpint, Sogndal IL
Sunniva Helland-Hansen, 24 år sandvolleyball, Rossvoll volleyball klubb
Særlege idrettsprestasjonar
Etter utdeling av utviklingsstipenda, delte fylkesordføraren ut ni utmerkingar for særlege idrettsprestasjonar til utøvarar frå Vestland i år.
– Det er idrettsprestasjonen som kvalifiserer utøvarane til ei slik utmerking. Kravet er medaljeplassering i senior verdsmeisterskap eller olympiske leikar, samt verdsrekordar eller verdscup samanlagt, sa fylkesordførar Jon Askeland.
Desse ni vart heidra
Mariell Gaassand Straume, kickboksing (24 år) Fana IL kickboksing
Bronsemedalje kickboksing (-60 kg), VM Jesolo, Italia 2021
Thea Vatshelle, kickboksing (23 år) Kronstad kampsportklubb
Bronsemedalje kickboksing (-70 kg), VM Jesolo, Italia 2021
Signe Elisabeth Belden, styrkeløft (38 år) Stryn turn og idrettslag
Gull benkpress (-63 kg), VM Halmstad, Sverige 2021
Tarjei Bø, skiskyting (33 år) Markane IL
Gullmedalje stafett, VM Pokljuka, Slovenia 2021
Johannes Thingnes Bø, skiskyting (28 år) Markane IL
Gullmedalje verdscupen samanlagt
Gullmedalje miksstafett
Gullmedalje stafett
Sølvmedalje singel miksstafett
Bronsemedalje jaktstart
VM Pokljuka, Slovenia 2021
Anders Mol, strandvolleyball (24 år) Beachvolley Vikings
Gullmedalje strandvolleyball, OL Tokyo, Japan 2021
Vann verdsseriefinalen, Sardinia, Italia 2021
Gustav Iden, triatlon (25 år) Åsane cykleklubb
Gull Ironman 70.3, VM St. George, USA 2021
Kristian Blummenfelt, triatlon (27 år) TIF Viking
Gullmedalje triatlon, OL Tokyo, Japan 2021
Gullmedalje triatlon, VM Edmonton, Canada 2021
Verdsrekord Ironman (7t 21min og 12 sek), Cozumel, Mexico 2021
Salum Ageze Kashafali, friidrett – sprint (28 år) IL Norna-Salhus
Gullmedalje og ny verdsrekord (10,43) 100 meter klasse T12, Para-OL Tokyo, Japan 2021
Alle har fått overrekt eit nytt kunstverk av året laga av kunstnar Els Geelen, som er frå Nederland, men busett i Norheimsund. Dei fleste av motiva er inspirert av den flotte vestlandsnaturen, samt ulike idrettar.
Var flyktning frå Kongo
På vegne av alle idrettsutøvarane takka Salum Ageze Kashafali for heideren.
– Eg kom frå Kongo som flyktning til Noreg. Idrett har mykje å seie for meg. Der kan alle samlast uavhengig av språk og kultur. Eg har redusert syn. At eg har vunne gullmedalje og sett verdsrekord er noko av det største, gøyaste og mest absurde eg har gjort. For to år sidan fekk eg utviklingsstipend av fylkeskommunen. Då hadde eg ingen form for støtte. Det var ganske viktig for meg å få det stipendet. Eg føler meg sett og tatt vare på av fylkeskommunen. På vegne av all ungdom som får slike stipend, vil eg seie stor takk, seier Salum Ageze Kashafali.
Eit forbilde
Fylkesordførar Jon Askeland kvitterte med ros tilbake.
– Salum er ein stor idrettsperson med prisverdige haldningar. Vi tok alle heilt av over din prestasjon. Du er eit forbilde for andre, og eg er viss på at du inspirerer mange både med dine haldningar og prestasjonar både utanfor og på idrettsbanen, sa Askeland under den digitale seremonien under fylkestinget i går.