Nær 4,5 millionar til attraktive stadar

Askøy kommune var ein av 16 kommunar i Vestland som fekk tilskot til stadutvikling i år. I Kleppestø sentrum skal kommunen lage ein inkluderande møteplass.

STADUTVIKLING: Det å setje menneske og stad i sentrum har vore viktig i tildeling av tilskot til by- og stadutvikling i 2021. (Illustrasjonsfoto: Shutterstock)

Av Birthe Johanne Finstad Publisert 21.09.2021 Endra 21.09.2021

Alle prosjekta som har fått pengar til by- og stadutvikling i år, fremjar berekraftig utvikling og set menneska og staden i sentrum.

Innbyggjarar i sentrum

– Vi ønskjer å løfte søknadar som støtter vilkåra på tvers av tilskotsordningane som gjeld temaa plan, klima og folkehelse. Difor har vi vurdert søknadane med eit tverrfagleg blikk, som skal kome innbyggjarane i kommunane til gode, seier Stalheim.

Nedst i saka finn du ei oversikt over alle som har fått støtte i år. Neste utlysing blir våren 2022. Det blir då høve for kommunane å søkje om meir pengar til å lage attraktive stadar for og saman med innbyggjarane sine.

Vil generere større engasjement

Dei 370 000 kronene Askøy kommune får, skal gå til å utvikle møteplassar saman med innbyggjarane i Kleppestø sentrum. Dei håpar tiltaka kan bli ein inngang til å generere større engasjement for sentrum, skape tilhøyrsle og bygge identitet.

– Medverknad er essensielt i slike prosessar. Kva er det som gjer at menneske stoppar opp? Kva er det folket som bur ein plass treng og vil ha? Vi gler oss til å sjå kva retning prosjektet tek når kommunen inviterer innbyggjarane inn i kreative medverknadsprosessar, seier Synnøve Stalheim, seksjonssjef for plan, klima og folkehelse.

Vestland fylkeskommune har fordelt til saman 4,475 millionar kroner i 2021. Enkelte prosjekt fekk også økonomisk støtte på tvers av fleire støtteordningar frå seksjon for plan, klima og folkehelse.

Desse kommunane fekk tilskot i 2021

Kommune	Tilskot	Prosjekt
Austevoll kommune	400 000	«Skulen i den trivelige tettstaden» Kommunen ønskjer Storebø skule skal vera ein aktiv og medverkande part i tettstadutviklinga, for å skapa eit sentrum og nærmiljø som stimulerer til trivsel, aktivitet og møte mellom folk.
Sveio kommune	200 000	«Førde attende på tettstadkartet» Utarbeiding av kunnskapsgrunnlag, og invitere til prosess med aktiv og deltakande medverknad frå lokalsamfunnet om å snu negativ folketalsutvikling.
Aurland kommune	425 000	«Eit samfunn der det er godt å bu og leve for alle – heile livet» Skape eit sentrumsområde som er tilgjengeleg, inkluderande og universalt utforma, med attraktive møteplassar for innbyggarar i alle aldrar. Samskaping og medverknad.
Hyllestad kommune	200 000	«Eit levande sentrum i Hyllestad» Sentrumsutvikling i Hyllestad gjennom brei involvering og fagekspertise. Fokus på sosial berekraft, folkehelsemål, biologisk mangfald, blågrøne strukturar sett saman med staden sin identitet og særpreg.
Samnanger kommune	400 000	«Med hjarta for Samnanger» Skape aktivitet og identitet i Samnanger og Tysse gjennom møteplassar.
Høyanger kommune	125 000	«Kunnskapsgrunnlag» Kunnskapsgrunnlag for utvikling av Sæbøtangen i Høyanger sentrum.
Askøy kommune	370 000	«Fra parkering til park i Kleppestø» Utforming av inkluderande og opne møteplassar i Kleppestø sentrum, med mål om å generere større engasjement for sentrum, skape tilhøyre og bygge identitet. Medverknad står sentralt.
Bømlo kommune	200 000	«Jonsok heile året – utan bål!» Kommunen vil ta med seg fellesskapskjensla og dugnadsånda frå jonsok inn i sentrumsutviklinga. Bømlatradisjonar, vakker natur og bruk av møteplassar på nye måter i ei ny tid.
Sogndal kommune	245 000	«Bygdelab» Kommunen skal etablere bygdelabbar i tettstadene Kaupanger, Leikanger, Balestrand og Sogndal. Innbyggjarar skal inkluderast i moglegheitsstudium for sentrumsområda i kommunen og i andre plan- og utviklingsprosessar som er under oppsegling.
Alver kommune	300 000	«Gåstrategi for Alver» Kommunen ønskjer å finne dei grøne mobilitetsløysingane for innbyggjarane i ein bilbasert kommune. Tverrfagleg arbeid, som etterfølgjer tidlegare arbeid med Sykkelstrategi og Friluftslivets ferdselsårer.
Kinn kommune	400 000	«Saman om Aktivitetsgate 1» Forprosjekt for opprusting av Gate 1 på Måløy, med fokus på samskaping og kulturell byplanlegging. Fysisk tilrettelegging og aktivitetsretta tiltak for å sikre heilskapleg byutvikling.
Stad kommune	400 000	«Grøne møteplassar – Saman om eit levande sentrum» Kommunen ønsker å utvikle Nordfjordeid til eit enda meir livskraftig og attraktivt sentrum, prega av staden sin eigenart og identitet gjennom «urbant landbruk». Kartlegging og konkrete tiltak.
Bjørnafjorden kommune	200 000	«Gatebruksplan for Osøyro regionsenter» Utarbeiding av gatebruksplan som regulerer overordna fysisk utforming av dei nye byromma, herunder torg og park.
Osterøy kommune	310 000	«Lonevåg for alle» Ein ope og tilgjengeleg park, med fokus på møteplassar og aktivitetar for ungdom. Medverknad.
Ulvik kommune	200 000	«Sprek og frisk i Ulvik sentrum» Transformasjon av asfalterte parkeringsplassar til møte-plassar for menneske. Ein ønskjer å utvikle ein heilskapleg plan for sentrum, samt ha utprøving av mellombelse installasjonar. Mål om brei medverknad.
Bergen kommune	100 000	«Medverknadsprosessar i planarbeid, med utgangspunkt i borgarinitiativ og kreative prosessar/metodar» Kommunen vil arrangere to verkstader for medverknad i samband med «strategisk planprogram for Åsane sentrale deler»: 1 - Mobilitet i Åsane; 2 - Mellombelse byrom og aktivitetsarenaer

Innbyggjarar i sentrum

Vil generere større engasjement

Desse kommunane fekk tilskot i 2021

Kommune

Tilskot

Prosjekt