Fylkeskommunen satsar på Leikanger
– Fylkeskommunen satsar stort på Leikanger og har mål om å skape fleire kompetansearbeidsplassar. Vi skal byggje om fylkeshuset til eit moderne og fleksibelt kontorbygg, og vi skal byggje eit nytt, frittståande fylkesarkiv, seier fylkesordførar Jon Askeland. Totalt har fylkestinget vedteke å bruke over 260 millionar kroner på dette.
Fylkeshuset på Leikanger skal byggast om og rehabiliterast for over 200 millionar kroner. I tillegg skal Leikanger få eit nytt bygg for fylkesarkivet til 59 millionar kroner.
Felles arkiv
– Vi manglar arkivplass og har behov for meir. Det same behovet har kommunane i fylket. Vi skal bygge eit felles arkiv, der vi skal leige ut arkivplass til kommunar som har behov for det. Fleire mogelege løysingar er vurdert, men det mest effektive og rimelegaste er å bygge eit nytt frittståande arkivbygg nært opp til fylkeshuset på Leikanger, seier fylkesordførar Jon Askeland,
Ei kartlegging viser at det er behov for om lag 15 500 nye hyllemeter med arkivplass. Det nye, frittståande arkivbygget blir på 1800 kvadratmeter. Fylkeskommunen har inngått intensjonsavtale om ei tomt på Leikanger. På tomta ligg det i dag ei utrangert bygning, Bamabygget. Intensjonsavtalen gjev fylkeskommunen rett til å kjøpe tomta for fire millionar kroner. Det inngår i kostnaden på 59 millionar kroner.
Over 30 år gammalt
Den andre store investeringa er fylkeshuset på Leikanger med totalt 204,9 millionar kroner.
– Fylkeshuset er over 30 år gammalt og har behov for rehabilitering av mellom anna tak, solskjerming og tekniske anlegg. Ved ei slik omfattande rehabilitering, er det naturleg at vi ser på løysingar og kontorkonsept slik at alle tilsette i fylkeskommunen på Leikanger kan få plass i fylkeshuset. Ei brukargruppe har tilrådd eit aktivitetsbasert kontorkonsept med frie plassar og relativ mange solokontor. Vi støttar dette konseptet, seier fylkesordførar Jon Askeland.
Skal bli samla i fylkeshuset
Dei tilsette i avdelinga for infrastruktur og veg på Leikanger har i dag kontor i nabobygget hos Statens vegvesen. Det er noko ledig plass i fylkeshuset, men ikkje nok plass til alle desse. Leigeavtalen hos Statens vegvesen gjeld ut 2024. Målet er at ombygginga av fylkeshuset skal vere ferdig til 1. januar 2025 og at alle tilsette med kontorplass på Leikanger frå denne dagen blir samla under same tak.