Dispensasjon for privatisteksamen og tilrettelagt undervising i Vestland
Vestland fylkeskommune har fått dispensasjon for å gjennomføre privatisteksamen under streiken. Totalt skal 14 000 privatisteksamenar avviklast, der 7500 er skriftlege.
– Eg er glad for dispensasjonen. Det er ekstremt viktig for den enkelte, slik at privatistane får eksamen og karakter, og kan søke høgskular og universitet. For fylkeskommunen er det ei prioritert oppgåve å gjennomføre privatisteksamen for alle som skal ta den, seier fylkesdirektør for opplæring og kompetanse, Bjørn Lyngedal.
Mange av privatisteksamenane er alt gjennomført. Siste skriftlege er 4. juni. Munnleg eksamen for privatistar held fram til og med 16. juni. Alle desse går som planlagt.
Vestland fylkeskommune har óg fått dispensasjon frå streiken for tilrettelagt undervising. Alle skular som har tilrettelagt undervising, vil gje tilbod om anten tilsyn eller undervising.