Nettstadutvikling
Biblioteket sin nettstad skal gi kvalitetssikra, oppdatert informasjon om alle dei ulike tenestene biblioteket tilbyr, og gi direkte tilgang til dei digitale bibliotektilboda. Fageininga for bibliotekutvikling hjelper folkebiblioteka til å få gode nettsideløysingar.
På veg mot ei nasjonal fellesløysing
KS Digital gjennomfører no (vår/sommar 2026) ein konkurranse om ei felles formidlingsløysing for biblioteka i Noreg. Løysninga skal inkludere nettside, app, integrasjonar med eksisterande biblioteksystem og fleire andre komponentar.
Vestland fylkeskommune vil saman med dei andre fylkeskommunane bidra med betydelege midlar for å få denne infrastrukturen på plass, og arbeider saman med Nasjonalbiblioteket for å fremje dette som ei løysing for alle norske bibliotek.
Målet vårt er å få flest mogleg av biblioteka i fylket over på den nasjonale fellesløysinga når den kjem. Når løysinga er klar og minst like god som dagens Webløft-sider, vil Vestland fylkeskommune avvikle sitt arbeid med andre nettsideløysingar.
Webløft
For å sikre at biblioteka hadde ei nettsideløysing tilpassa biblioteka sine behov, har vi tilbydd ei nettsideløysing for biblioteka. Vi har bygd nettstader i WordPress ved hjelp av ein mal utvikla i prosjektet Webløft, med komponentar tilpassa biblioteka sine behov. Løysinga bygger på fri og open programvare. Saman med biblioteket fann vi ut kva utforming og oppsett som passar, og bygde opp ein enkel nettstad biblioteket sjølv kunne oppdatere.
I 2022 samarbeidde vi med Viken fylkesbibliotek om å få utvikla eit nytt design for Webløft-nettstader. Det nye designet auka tryggleiken, var betre med tanke på universell utforming og responsivitet, og har eit modernisert visuelt uttrykk samanlikna med tidlegare Webløft-sider.