Kven kan ha lærlingar?

Mangelen på faglært arbeidskraft er stor i mange bransjar i Vestland. Samtidig er det kanskje mange verksemder som ikkje veit at dei kan bli lærebedrift eller kva som skal til. Her får du svar på typiske spørsmål.

Å vere lærebedrift handlar ikkje berre om samfunnsansvar, det er også god rekruttering.

– Ved å ta inn lærlingar får bedrifter moglegheit til å forme eigen arbeidskraft. Når det er ei god kopling, blir lærlingane ofte verande, seier  Audun Bjelland, prosjektleiar vaksenopplæring og rektor i Nettskulen Vestland.

Kven kan bli lærebedrift?

Kort sagt kan dei fleste bli lærebedrift. Det avgjerande er at bedrifta har rammer og kompetanse til å gi systematisk opplæring som samsvarer med krava i fagopplæringa.

–  For å få godkjenning må produksjonen til bedrifta leggje til rette for opplæring i samsvar med læreplanen i faget, Dagfinn Henjum Sværen, Kvalitet i opplæringa – Vestland fylkeskommune.

Det spelar mindre rolle om bedrifta er lita eller stor. Dersom bedrifta ikkje kan dekke alle kompetansemåla aleine, fins det løysingar i samarbeid med andre bedrifter eller gjennom tilbod frå fylkeskommunen.

Les også: Slik kan bedrifter få faglært arbeidskraft

Kva krav må vere oppfylt?

For å bli godkjent lærebedrift må verksemda:

  • kunne gi opplæring i samsvar med læreplanen
  • ha ein fagleg leiar med rett kompetanse
  • lage ein plan for opplæringa
  • følge lærlingen opp i det daglege arbeidet

Slik blir du godkjent lærebedrift

Prosessen startar med å søke via fylkeskommunen. Der får bedrifta rettleiing gjennom heile løpet. Det fins kurs for faglege leiarar, mellom anna med vekt på relasjonskompetanse og god opplæring av lærlingar.

– Ikkje ver redd for å ta imot lærlingar. Det fins mange som jobbar for å gjere det enklare og meir tilgjengeleg, seier Bjelland.

Gjennom samarbeidet Fagveg jobbar Nav og fylkeskommunen saman om yrkesfagleg utdanning for vaksne over 19 år, for å dekke behovet for faglært arbeidskraft i mange bransjar.

– Når Nav, fylkeskommune og næringsliv samarbeider tett, kan vi få til mykje. Mange er i dag utanfor arbeid og utdanning, samstundes har næringslivet eit stor behov for faglært arbeidskraft. Samhandlinga er vinn-vinn for alle partar seier Linn Birkeland, som er prosjektkoordinator i Fagveg, Vestland fylkeskommune.