Tilskot til friluftsaktivitet

Mål for ordninga

Tilskotsordninga skal medverke til auka deltaking i helsefremjande, trivselsskapande og miljøvennleg friluftsliv for alle grupper i befolkninga med vekt på dei målgruppene som er særleg prioritert i ordninga.

Kven kan søkje

Frivillige medlemsorganisasjonar som er registrert i Enhetsregisteret (Brønnøysundregisteret) og interkommunale friluftsråd som arbeider med aktivitetsfremjande tiltak for friluftsliv.

Kva kan få støtte

Det blir primært gitt tilskot til friluftstiltak som stimulerer til direkte friluftsaktivitet, som til dømes organiserte turar, friluftsleirar, praktiske kurs og anna opplæring i friluftslivsaktivitetar.

Deler av tilskotet kan nyttast til innkjøp av enkelt utstyr og materiell, som medverkar til å fremje den friluftslivsaktiviteten som det blir søkt om tilskot til. Det kan vere til dømes fiskestenger, kompass, eit avgrensa tal enkle telt og liknande. Informasjonstiltak om rettar og pliktar etter allemannsretten kan òg få tilskot.

Fylkeskommunen gir ikkje tilskot til kostnadskrevjande utstyr, utstyrssentralar og liknande.

Vi prioriterer dette i tildelinga:

• Aktivitetar som er lite ressurskrevjande og lett tilgjengelege for ulike brukargrupper.
• Tiltak som blir gjennomført i nærmiljøet, med særleg vekt på byar og tettstader.
• Tiltak som medverkar til auka deltaking over tid.
• Tiltak retta mot personar som er lite fysisk aktive.
• Tiltak retta mot barn, unge og barnefamiliar.
• Tiltak retta mot personar med nedsett funksjonsevne.
• Tiltak som inkluderer ein plan for marknadsføring av tiltaket ovanfor aktuelle målgrupper 
• Tiltak som fører til auka deltaking i friluftsliv blant personar med innvandrarbakgrunn, herunder friluftslivstiltak som fører til auka integrering av personar med innvandrarbakgrunn i befolkninga elles. 

Tiltak som har fått tilskot i tre år eller meir vil ikkje bli prioritert.

Gode prosjekt vert støtta med tilskot frå 10 000 kr til 100 000 kr. Fylkeskommunalt tilskot kan ikkje vere høgare enn 50 prosent av dei totale ressursane for prosjektet. Dugnad kan reknast som eigenfinansiering (inntil kr 300,- pr/time).

Sakshandsaming og vedtak

Forvaltningslova ligg til grunn for all søknadshandsaming i Vestland fylkeskommune. Alle søknader er i utgangspunktet offentleg tilgjengelege, jf. Forvaltningslova (Fvl.). Unnatak gjeld personopplysningar. Desse vert unnateke offentlegheita jf. Fvl. §13. I særlege tilfelle kan utsett offentlegheit vurderast etter Fvl. Avdeling for Kultur og folkehelse førebur søknadane for politisk handsaming og vedtak i Hovudutval for kultur, idrett og inkludering. Kvar søknad er eit einskildvedtak og innstilling skal grunngjevast i saksframlegget. Vedtak som fråvik frå fylkesdirektør si innstilling skal også grunngjevast. Søknadene skal i hovudsak vere handsama innan tre månader etter søknadsfrist.