Cautus Geo skal overvaka skredløpa Heimefonna, Sandvika/Bukkeskora og Kroka i eitt system. Det dekkjer ei strekning på 1,6 kilometer langs Oldevatnet.
Skal teste og kalibrere anlegget
Trafikkvarslingssystemet for raude stopplys (blinkande raude lys) er for tida under testing og kalibrering, men anlegget vert ikkje sett i drift for trafikantar i mars 2024. Radaranlegget er ferdig installert, og resten av vinteren vert nytta til kalibrering og justering for best mogleg funksjon. Den pågåande kalibreringa er nødvendig for å sikre optimal yting og nøyaktigheit når systemet blir teke i bruk.
Testinga av anlegget vil også halde fram etter implementeringa, med formål om å kontinuerleg optimalisere systemet for å gi mest mogleg presis og effektiv varsling.
Vi set i gang varslingstenesta for trafikantar i november 2024.
Slik fungerer skredovervakinga
Oppsettet for Oldedalen er omfattande, og anlegget består av radarar, kamera og stopplys. Dei skal automatisk og kontinuerleg overvaka tre av dei mest utsette skredløpa. Trafikken blir stoppa automatisk av lysanlegg om skred blir registrert, og vegen blir opna automatisk etter 30 sekunder dersom radarane ser at skredet ikkje går ned mot vegbanen. Større skredhendingar der skred stoppar i vegbana eller rett over, vil kunne føre til ei lengre stenging. Då må VTS, byggeleiing, driftsentreprenør og geologar etter eiga prosedyre handtere og avklare skredhendinga.
Alle raudblinkar vil aktiverast når eit skred vert detektert – ikkje berre raudblinkane for det aktuelle skredløpet. I tillegg er det simulert med fartsgrense på 40 km/t, og om ein held farten vil ein nå neste stopplys og sikker sone før skredet når vegen. Raudblinken kjem på ved registrering av skredet, uavhengig om det når vegen. Dersom ein får grønt lys, så har ikkje skredet nådd vegen.
Merk Røyrtunell ved Sandvika: Det kan gå skred over røyrtunellen som fører til stengt veg, sjølv om skreda går over tunellen. Vi er klar over problemstillinga og har kome fram til korleis vi kan gå fram for å optimalisere funksjonen. Dette krev at vi må starte ein plass, og vi treng skreddata for å optimalisere. Vår første prioritet er framleis at trafikantar ikkje skal bli tekne i skred.
Sikrar trygg passasje
I februar 2020 redda eit tilsvarande anlegg liv i Lom, og det er mange gode erfaringar frå i underkant av 20 anlegg rundt i landet. Kvart område og skredløp er unikt, og vi tek derfor høgde for at det trengs kalibrering og justering for å optimalisere skredvarslingsanlegget i dette området. Dette er kontinuerleg arbeid, og vi ønskjer å starte med et ekstra sensitivt anlegg. Det gjer at raudblinken aktiverast i stadet for å halde ope ved usikker registrering. Dette kan gi hyppigare stenging i innkøyringsfasen enn nødvendig, men er heilt nødvendig for å sikre eit påliteleg system.
Fylkesvegen er mykje trafikkert i turistsesongen, og vegen er ein av dei mer utsette i Vestland fylkeskommune. På vinterstid fell trafikkmengda vesentleg, men kvart døgn blir 450 bilar talde forbi skredområda. 90 av desse er tungtrafikk. Skredsikringa gjer at trafikantane kan passere tryggare.
Vi jobbar kontinuerleg med justering og forbetring av anlegget, og vi kjem med meir informasjon til hausten før anlegget vert sett i drift.