Vestland fylkeskommune lyser ut over 10 millionar til ladeinfrastruktur
Vestland fylkeskommune lyser ut 10,48 millionar kroner i tilskot til utbygging av hurtiglading for elbilar og tunge køyretøy. Sjå kva område vi prioriterer særleg i år.
Av midlane er 3,68 millionar kroner sett av til hurtiglading for personbilar og 6,8 millionar til tunge køyretøy.
For personbilar er målet å betre ladetilbodet i område med dårleg dekning. Konkrete lokasjonar som er særleg aktuelle for søknader i 2026:
- Bømlo: Moster og Finnås
- Høyanger: Høyanger sentrum, Bjordal/Ortnevik
- Kvam: Strandebarm og Ålvik
- Bremanger: Davik
- Stad: Selje
- Vik: Vik
- Stryn: Olden, Innvik, Utvik
- Gulen: i hovudsak knytt til ferjeområda/Rutledal/fylkesveg 57
- Hyllestad: fylkesveg 57, fylkesveg 607
- Gloppen: fylkesveg 615, Hyen, Hope
Til kart over ladestasjonar i Vestland ChargeFinder - Charging stations for electric cars (EV)
Tunge køyretøy og beredskap
Når det gjeld tunge køyretøy (3,5–16 tonn og over) blir innfartsårer til byane, sentrale strekningar og strategiske næringsområde prioriterte. Fylkeskommunen legg vekt på at tildelingane ikkje skal overlappe med ordningane til Enova og Statens vegvesen.
Beredskap er også eit omsyn i satsinga: Store batteri i tunge køyretøy kan fungere som mobile straumlager i krisetider.
Tal på kor langt elektrifiseringa har kome
Vestland fylkeskommune vedtatt mål om netto nullutslepp innan 2030, og at transportmiddel skal bli nærmast utsleppsfrie. Det skal leggast til rette for overgang til låg- og nullutslepp for alle transportformer, både på veg, i sjø og innan luftfart. Nok ladepunkt som gjer det attraktivt å velje elektriske køyretøy, gjev fortgang i omstillinga.
Statistikk frå Opplysningsrådet for veitrafikken (OFV) syner at 98,94 prosent av alle nyregistrerte personbilar i Vestland var elektriske ved utgangen av april 2026. Av alle bilar i Vestland er 40,37 prosent elektriske– resten er i hovudsak diesel (27,23 prosent) og bensin (20,87 prosent).
For varebilar er 54,85 prosent av nyregistreringane elektriske, men berre 10,04 prosent totalt – medan 87,04 prosent framleis går på diesel.
4,33 prosent av den totale køyretøybestanden i Vestland for lastebilar er elektrisk per 30.04.2026. Talet aukar, og stadig fleire nyregistrerte lastebilar er elektriske.
Kven kan søkje?
Hurtigladeoperatøren skal vere eit lovleg etablert føretak, til dømes kommunar og private hurtigladeoperatørar.
Søkjar kan gjerne samarbeide med til dømes andre ladeoperatørar, kommunar, eigedomsforvaltarar, grunneigarar, helseføretak, handels- og serviceverksemder, og kraftselskap i prosjektet. Det er òg ynskjeleg med spleiselag, der søkjar får finansiering frå andre eksterne aktørar utover det denne ordninga gjev rom for åleine. Til dømes Merkur-programmet. Merkur-programmet gjeld spesifikt for Merkur-butikkar i distrikta.
Det var totalt 116 Merkur-butikkar i Vestland per 1 januar 2024. Her kan det vere uutnytta potensiale i Vestland.
Søknadsfrist er 17. august 2026.
Her finn du søknadsskjema og meir informasjon om ordninga
Eiga ordning for reiselivsaktørar
Vestland har òg ei anna ordning knytt til ladeinfrastruktur: Tilskot til normalladarar ved reiselivsdestinasjonar i Vestland - Vestland fylkeskommune. Dette er i hovudsak ei ordning for overnattingsplassar knytt til reiselivet i Vestland, men òg til parkeringsanlegg knytt til kulturareanaar og turområde.