Frå idé til liv i bygda – Bolstadøyri vil skape meir aktivitet og fellesskap

 

Bolstadøyri er ei relativt lita grend i Voss herad. Ved årsskiftet telde grenda 216 innbyggjarar fordelt på 167 vaksne og 49 born under 15 år. Bygda er peikt ut som eit viktig utviklingsområde vest i kommunen. Her er det god plass til nybygging og tilflytting. Bygda har utfordringar knytt til svak folketalsvekst, litt uavklara bustadbygging og uro rundt vidare drift av barnehagen. Grendalaget håpar at LivOGLyst-prosjektet kan bidra til å samle bygda rundt nye idear. 

Starta med ope møte

Det heile starta med eit ope møte, før søknaden om forprosjektmidlar vart send. 32 menneske møtte fram og konkluderte samrøystes med at jo, dette vil vi vere med på! Aldersspennet i gruppa var frå 19 til 75 år, og kjønnsbalansen var god.  

Laget fekk inn mange idear, og det var stor interesse for å gjere noko.  

Eit av kriteria for å søke på LivOGLyst-programmet, er at initiativet til prosjektet kjem frå innbyggarane, og at prosjektet er blitt forankra i lokalsamfunnet i forkant av søknaden. 

– Ei god forankring i lokalsamfunnet før ein søker om å bli forprosjekt er med på å styrke søknaden, og kan gi ein ekstra god start på prosjektet, seier programansvarleg Ingrid Kristiane Fardal i Vestland fylkeskommune.

Ung prosjektleiar

På det første møtet melde det seg spontant fem-seks personar som ville sitje i prosjektstyret. Ein av dei som engasjerte seg på møtet var 19 år gamle Kaia Bolstad. Ho vart etter kvart prosjektleiar. 

– Eg vart ein del av ungdomslagsstyret i fjor, og møtte på det opne møtet før vi søkte, fortel ho. 

Bolstad studerer i Bergen, men kjem frå Bolstadøyri og ønskjer å bidra til aktivitet i bygda. 

– Eg trur eg kjem til å flytte tilbake når eg vert vaksen, seier ho. 

Prosjektstyret speglar også mangfaldet i bygda. 

– Vi har eit par som har kjøpt hus på Bolstad, dei er frå Brasil og Italia. Det er spennande å få inn nokre heilt nye innfallsvinklar, seier Bolstad. 

Saknar møteplassar

Eit viktig tema som kom opp på møtet, var behovet for fleire uformelle møteplassar. 

– Vi har ingen butikk eller noko lenger, så det saknar folk, seier Bolstad. 

Ungdomshuset blir brukt til konfirmasjonar og quiz, men mange etterlyser fleire lågterskelarenaer i kvardagen. 

– Litt av målet med prosjektet er å gjere det triveleg for alle generasjonar, studentar, pensjonistar, skuleungdom og barnefamiliar, seier Astrid Rongen i grendalaget. 

– Eit LivOGLyst-prosjekt skal formast av heile lokalsamfunnet på tvers av alder, bakgrunn og interesser. Dette er med på å halde liv i gamle tradisjonar samtidig som ein får fram nye, spanande idear der alle får moglegheit til å bidra og delta i det ein synest er gøy, seier Fardal.

Peikar på mangfald og dugnadsånd

Mangfaldet i bygda og viljen til å stille opp er noko av det Bolstad og Rongen trekkjer fram som styrkane til Bolstadøyri. 

– Det bur mange ulike folk her, både i alder og med ulike bakgrunnar og etnisitetar. Vi har eit stort kulturelt mangfald, seier Bolstad. 

Ho meiner også at dugnadsånda står sterkt. 

Rongen peikar og på at bygda allereie har fleire møteplassar og initiativ å bygge vidare på. 

– Vi har bedehus, ungdomshus, barnehage og bokkafé der vi samlar inn og låner ut bøker, seier ho. 

Mange idear på bordet

Det har alt kome fram ei rekke idear til aktivitetar. 

– Folk ønsker seg fleire idrettstilbod, klatreklubb, konsertar, temafestar, kurs i lokale mattradisjonar, dansekurs og kanskje badstove, ramsar Bolstad opp. 

Ho trur bygda kan hente inspirasjon frå aktivitetar som fanst før, då det var skule i bygda. Då var det tilstellingar som revy eller karneval for heile bygda. 

Neste steg i prosjektet er å involvere fleire i arbeidet. 

– Vi skal ha styremøte og sjå på andre LivOGLyst-prosjekt. Vi planlegg og å arrangere pizzamøter for ulike aldersgrupper for å høyre kva som skal til for å engasjere dei, seier Bolstad. 

På det første møtet var det særleg mange i alderen 30 til 60 år som møtte opp. Framover vil dei gjerne høyre meir frå barn, ungdom og pensjonistar. 

Råd til andre bygder

Både Bolstad og Rongen oppmodar andre lokalsamfunn til å søkje LivOGLyst-midlar. 

– Ta ein pangstart og ikkje planlegg for mykje i forkant. Fiks mat og gå rett på folkemøte, seier Bolstad. 

Rongen legg til at openheit er viktig. 

– Ha stor takhøgde, legg til rette for at folk kan seie meininga si og vere med og bidra.

– Alle kan ta initiativ til å starte eit LivOGLyst-prosjekt, men det er lurt å få med seg fleire frå lokalsamfunnet sitt, slik at ein er ei god gruppe som kan jobbe saman med søknad og forankring av denne. Så er det berre å brette opp ermane og køyre på dersom ein vert tatt opp i programmet, seier Fardal.

Vil vise at idear kan bli til handling

Forprosjektet på Bolstadøyri starta i januar og skal hjelpe bygda med å utvikle ideane vidare. Målet er etter kvart å søkje om eit hovudprosjekt. 

Men aller først vil dei vise at idear kan bli til handling. 

– Det er viktig å realisere nokre av ideane slik at folk ser at dei har påverknad. Elles mistar folk engasjementet, seier Rongen. 

Bolstad opplever allereie at prosjektet har gitt henne ei ny rolle i bygda. 

– Eg har fått uttrykt det eg saknar. Alt av aktivitet døydde ut etter kvart som eg vaks opp. No føler eg at eg kan få ballen litt i gang når eg sit i styret sjølv. No vert det diskotek! 

Drøymer om meir kvardagsfellesskap

Både Kaia Bolstad og Astrid Rongen håpar prosjektet kan gjere det lettare for folk å møtast i kvardagen. 

– Eg drøymer om mange små arrangement, og at folk tør å invitere naboane sine på besøk, slik ein gjorde meir då eg var mindre. At folk vert meir inkluderande i kvardagen og ikkje sit så mykje heime i sine eigne hus og berre går ut på store arrangement, seier Bolstad. 

Ho håpar også at terskelen for å møtast ute i bygda blir lågare. 

– Til dømes at folk går på stranda og brenner bål i ny og ne, og tek med seg ein ekstra. 

Her er alle LivOGLyst-prosjekta i Vestland

 

Hovudprosjekt
Follese	Askøy
Hatlestrand, Ølve, Varalsøy (HØV'et)	Kvinnherad
Viksdalen	Sunnfjord
Milde og Hjellestad	Bergen
Sørbøvåg	Hyllestad
Eikefjord	Kinn
Bua	Sveio
Løvstakken	Bergen
Salhus	Bergen
Sørsida	Høyanger
Auklandshamn	Sveio
Kyrkjebø	Høyanger
Nordsida	Stryn
Ålvik	Kvam Herad
Brekke	Gulen Kommune
Ljøsne	Lærdal
Fjærland	Sogndal
Bulken	Voss
Førdefjorden	Askvoll
Forprosjekt
Davik	Bremanger
Naustedalen	Sunnfjord
Nordnes	Bergen
Husebøkrinsen	Alver
Flekke	Fjaler
Oksenhalvøya	Voss
Almenningen	Kinn
Bolstadøyri	Voss
Flatraket	Stad
Oldedalen	Stryn
Selje	Stad
Smørås	Bergen
Stanghelle	Vaksdal
Våge	Fjaler