Dette er dei største vegprosjekta Vestland fylkeskommune skal lyse ut i 2025
Vestland fylkeskommune skal investere til saman 3,4 milliardar kroner i veg i 2025. Her er dei 20 største prosjekta som er planlagt utlyst i år.
Aktiviteten på vegfronten er stor i Vestland fylkeskommune i år, med mange små og store prosjekt. Fylkeskommunen investerer i år heile 3,4 milliardar kroner på veg, mot 2,5 milliardar i 2024. Dei komande fire åra skal det investerast for over 3 milliardar kroner kvart år.
200 vegprosjekt året rundt
— Totalt har Vestland fylkeskommune om lag 200 store og små vegprosjekt i 2025. Nokre prosjekt er starta opp, medan andre kan bli starta opp i løpet av året. Vi har også om lag 60 planar som vi jobbar med i ulike fasar, både forprosjekt og reguleringsplanar. Totalt har vi ei ramme på 70,5 millionar kroner i år til planarbeid, seier Dina Lefdal, direktør infrastruktur og veg i Vestland fylkeskommune.
Det er størst aktivitet i prosjekt knytt til dei seks bompengepakkane i Vestland; Byvekstavtalen/Miljøløftet, Bømlopakken, Kvinnheradspakken, Nordhordlandspakken, Askøypakken og Førdepakken.
— I dei neste fire åra vil ramma for desse bompengepakkane vere på 4 milliardar kroner. I tillegg har vi eit stort ferjeavløysingsprosjekt på Ytre Steinsund som no er godt i gang, og som etter planen skal vere ferdig i løpet av 2026, seier Lefdal.
Nokre av prosjekta som etter planen skal lysast ut i 2025
Byvekstavtalen/Miljøløftet
fv. 587 Søylen-Sundsbrua (40 mill. kr)
fv. 5198 Oppgradering av veg ved Sædalselven (40 mill. kr)
fv. 5190 Apeltunvegen (50 mill. kr)
fv. 558 Rekkverk Kringsjåvegen (15 mill. kr)
fv. 5324 Hagerups vei, Storetveitvegen-Nattlandsveien (60 mill. kr)
Førdepakken
fv. 601 Angedalsvegen til Prestfossen bru (542 mill. kr)
fv. 601 Prestfossen bru til Slåtten (56 mill. kr)
Nordhordlandspakken
fv. 5310 Fosse-Moldekleiv (430 mill. kr)
fv. 564 Fløksand-Vikebø (300 mill. kr)
Kvinnheradspakken
fv. 5028 Kaldestadvegen (40 mill. kr)
Vegprosjekt
fv. 5402 Bavallsvegen (250 mill. kr)
fv. 548 Skånevik-Nesvågen-Flesjo (140 mill. kr)
Bru og kai
fv. 550 Herandselva bru (21 mill. kr)
fv. 60 Storelva bru, Utvik (37 mill. kr)
fv. 5591 Røldalsfjord bru (76 mill. kr)
fv. 565 Alversundbrua (740 mill. kr)
Tunelloppgradering
fv. 614 Maghildskaret-tunellen (300 mill. kr)
Tilrettelegging for mjuke trafikkantar
fv. 79 Øystese-Laupsa (60 mill. kr)
Skredsikring
fv. 609 Tunell ved Heilevang (1,1 mrd. kr)
fv. 569 Flaum og skredsikring ved Slottet (43 mill. kr)
Vi er i avslutningsfase i planarbeidet på to store tunnel-/skredsikringsprosjekt: fv. 49 Tokagjelet og fv. 49 Nordrepollen-Austrepollen. I tillegg jobbar vi med førebuande arbeid for utlysing av ferjeavløysingsprosjektet Atløysambandet.
Sjå kart over vegprosjekta
På vlfk.no kan du til ei kvar tid følgje med på kva vegprosjekt vi jobbar med: Sjå våre fylkesvegprosjekt i kart
Fakta
Fylkeskommunen har ansvar for planlegging, bygging, drift og vedlikehald av fylkesvegane. Vi har ansvar for
- 287 tunnelløp
- 2083 bruer
- 5600 km fylkesveg
- 306 km gang- og sykkelveg
- 76 fylkesvegkaiar
- 273 skredpunkt (høg og middels skredfaktor)
Retting 6. mars 2025: fv. 5028 Kaldestadvegen stod tidlegare oppført med 85 mill. kroner. Rett skal vere 40 millionar kroner.