Prioriterer drosjenæringa i årets utlysing av tilskot til hurtigladeplassar
Vestland fylkeskommune har sett av 4,5 millionar kroner til tilskot til hurtigladeplassar for elbil i 2024. Søknadsfristen er 3. september.
Det skal vere praktisk å køyre elbil i heile fylket, og fylkeskommunen har gitt bidrag til utrulling av det offentlege hurtigladenettet over fleire år. Det er også i samsvar med fylkeskommunen sitt mål om at klima og miljø skal vere premiss for samfunnsutviklinga.
Prioriterer drosjenæringa i år
Utlysinga gjeld for heile fylket, men fylkeskommunen kjem i år til å prioritere betre dekning i distrikta, med hovudvekt på å løyse utfordringar for drosjenæringa. Det gjeld mellom anna i distriktsområda rundt Bergen, som til dømes nordlege delar av Nordhordland, Masfjorden/Masfjordnes, Osterøy, tidlegare Fusa/Eikelandsosen, i tillegg til Austevoll og Bremanger.
Denne tilskotsordninga støttar ikkje heimelading/normalladeuttak for drosje eller ladeanlegg i private burettslag og sameige. Sjå eiga ordning for støtte til heimelading/normalladeuttak for drosje.
Sambruk mellom bil og båt
Både kommunar og private hurtigladeoperatørar kan søkje fylkeskommunen om tilskot til å etablere hurtigladeplassar. Ordninga skal gjere det mogleg å bygge ut hurtigladeplassar på stadar der utbygging ikkje kan skje på kommersielt grunnlag aleine.
Elektrifisering av bilparken er eitt av satsingsområda for å nå måla om klimaomstilling. Det er framleis behov for offentleg stønad til etablering av ladeinfrastruktur i fylket. Det gjeld i område der låg elbildel gjev lågt kundegrunnlag, og i nisjar der elektrifiseringa ikkje er komen godt i gang enno.
I tillegg til hurtigladeplassar for elbil er det aktuelt å prioritere sambruk av infrastruktur mellom bil og båt. Dette er ei ønska tilnærming for å nå ut til fleire potensielle brukarar.