Nettverk for by- og stadutvikling: Den gode samtalen
Nettverket er ein møteplass for alle kommunane i Vestland og Vestland fylkeskommune. Her skal me utveksle erfaringar, lære av kvarandre og få ny kunnskap og idear til nye samarbeid på tvers av fag og geografi.
Emne for møtet 2. desember er kunst i stadutvikling, og me har invitert med oss Hanne Ugelstad og Malin Barth.
Hanne er kunstnar og kurator, og har lang erfaring frå arbeid med marginaliserte grupper. Ho arbeider som pedagogisk leiar i Street Art Oslo. I arbeidet sitt er ho oppteken av korleis kunst i offentleg rom kan styrke samfunnsdeltaking og skape nye måtar for å møte byen/staden og kvarandre på. Hanne arbeider også for å forme arenaer for unge og ikkje-etablerte kunstnarar.
Malin er direktør for Kunsthall 3,14 i Bergen. Ho kjem for å fortelje om Vågsbunnen stemmer, eit samarbeid mellom Kunsthall 3,14, Kirkens Bymisjon, Forandringshuset V13, Huset Bergen, Bergen Sentrum AS, Bergens Næringsråd og lokale restaurantar, butikkar og organisasjonar.
Prosjektet foreinar kunst, byutvikling og medverknad i ei tid med trong for fellesskap, omsorg og lokale svar. Korleis bygge nabolag som ikkje berre rommar ulikskap, men som aktivt dyrkar det?
Med desse innlegga tek me og opp tråden frå synfaringa på plankonferansen 3. november 2025 – menneske i sentrum.
Ta kontakt
Har du innspel til emne for framtidige møte i nettverket, ta kontakt med Mona.
Det er faste møte i nettverket første tysdag i kvar månad klokka 10–11. Me utviklar innhald og form på møta saman med kommunane.