Bompengepakkar og andre pakkar

Vi tek atterhald om at det kan vere noko unøyaktig detaljinformasjon i kartløysinga.

Kartet viser prosjekt på fylkesveg i regi av bompengepakkar, men ikkje prosjekt på riksveg og kommunal veg. Mindre prosjekt i bompengepakkene går heller ikkje fram av kartet. Stortingsproposisjonane legg føringar for styring av bompengepakkar.

Det er høg aktivitet på fleire av bompengeprosjekta i økonomiplanperioden. Førdepakken er forlenga med fem år, og aktiviteten i pakken vil auke. Mot slutten av komande økonomiplanperiode vert utbygging i Kvinnheradpakken og Bømlopakken avslutta.

Fylkeskommunen har inngått dialog med Osterøy kommune om ein bompengepakke i kommunen. Vidare vert det arbeidd med eit fagleg grunnlag for delvis bompengefinansiering av fv. 49 Steinsdalen-Eikedalen (Tokagjelet).

Med utgangspunkt i oppdaterte kostnadsanslag viser det seg at ikkje alle prosjekta let seg finansiere i fleire av pakkane. Pakkane skal porteføljestyrast, og det vil vere behov for å ei vurdering av moglegheiter for kostnadsreduserande tiltak og/eller at prosjekt må utgå av pakkane. Det er kontaktutvala for bompengepakkane som har ansvar for porteføljestyring av pakkane.

Følgjande pakkar omfattar fylkesveg:

Førdepakken

Førdepakken vart vedteken i 2015 med delvis bompengefinansiering. Samla sett er det 20 prosjekt på riksveg, fylkesveg og kommunal veg. Stortinget vedtok i januar 2025 forlenging av Førdepakken til 2033, og aktiviteten i denne pakka vil auke betydeleg.

Nordhordlandspakken

Nordhordlandspakken vart vedteken i 2017 med delvis bompengefinansiering. Pakken har 19 delprosjekt, og omfattar både fylkesveg- og riksvegprosjekt.

Askøypakken

Askøypakken vart vedteken i 2013 med delvis bompengefinansiering av fylkesvegprosjekt. Revidert Askøypakke vart vedtatt mai 2022, og legg opp til eit bidrag i finansiering med ytterlegare 648 mill. kr. til fullføring av dei attverande prosjekta i pakken.

Bypakke Bergen

Bypakke Bergen inngår som del av byvekstavtalen for Bergensområdet, og finansierer ulike tiltak for å nå det nasjonale målet om nullvekst i persontransport med personbil i Bergen. Prosjekta i Bergen er omtala under Miljøløftet.

Kvinnheradpakken

Stortinget vedtok bompengepakken i mai 2022. Den er delvis finansiert gjennom bruk av m.a. fylkeskommunale skredsikringsmidlar. Pakken omfattar 7 prosjekt på fylkesveg, inklusiv ei samleløyving til punkttiltak/TS-tiltak.

Bømlopakken

Stortinget vedtok Revidert Bømlopakke i desember 2021, med 3 hovudprosjekt og 3 reserveprosjekt på fylkesveg.

Kvammapakken

Innkrevjinga i Kvammapakken går til å dekke lån til tidlegare investeringar, og det blir ikkje sett i gang nye prosjekt i pakken.

Haugalandspakken

Haugalandspakken har ikkje innkreving i Vestland, men omfattar prosjekt i Sveio og Etne kommunar. Pakken er forlenga fram til utgangen av 2026, eller til en eventuell ny bompengefinansiert bypakke for Haugesund og fastlands-Karmøy er etablert. Det er venta at den nye bypakken startar innkrevjing hausten 2025. Det er avsett eit mindre beløp til tiltak på fv. 47 gjennom Sveio.