Ti strategiar i Utviklingsplanen

Vestland skal jobbe for innovasjon og styrka samarbeid mellom offentleg sektor, forskingsmiljø, næringsliv og samfunn.

Vi skal møte samfunnsutfordringar med kunnskap, samskaping og nytenking. Fylkeskommunen og kommunane har ei viktig rolle i å samle og mobilisere aktørar frå offentleg sektor, næringsliv, forsking og samfunnsliv.

Det betyr at vi skal:

• Utvikle nye løysingar på tvers av sektorar og fagområde.
• Styrke kompetansen på samarbeid og samskaping.
• Bygge sterke innovasjonsmiljø med teknologisk og fagleg breidde.
• Knyte utdanning tettare til arbeidsliv for å møte behovet for rett kompetanse.

Frivillig sektor og kulturliv skal vere inkluderande arenaer for deltaking, engasjement og lokaldemokrati. Samarbeid med frivilligheita bidreg til både folkehelse og sosial berekraft.

Vestland skal:

• Fremje entreprenørskap og nye forretningsmodellar.
• Styrke forsking og kompetansearbeidsplassar i heile fylket.
• Vere ein aktiv aktør i europeisk samarbeid og påverke EU-politikk.
• Støtte kommunar i samarbeidet med frivillig sektor og legge til rette for brei deltaking.

Eit innovativt Vestland byggjer på samarbeid, deling og vilje til å prøve nytt, til beste for både folk, næringsliv og offentlege tenester.

Vestland skal utvikle framtidsretta og sikker infrastruktur og gode tenestetilbod gjennom brei innsats i alle sektorar.

Fylkeskommunen og kommunane spelar ei nøkkelrolle i å utvikle robuste tenester og infrastruktur som møter framtidas behov. Gjennom planlegging, beredskap og innovasjon skal vi balansere miljømessige, sosiale og økonomiske omsyn.

Det betyr at vi skal:

• Tilpasse tenestene til nye føresetnader og lokale behov.
• Bruke kunstig intelligens og datadreven innovasjon på ein trygg og nyttig måte.
• Vidareutvikle digital infrastruktur og styrkje digital sikkerheit.
• Sikre god breibanddekning og kommunikasjon i heile fylket.
• Planleggje for trygg, samordna og berekraftig mobilitet, både på land og i sjø.
• Styrkje logistikk og hamnesamarbeid for næringslivet.
• Fremje samarbeid mellom kommunar for betre kunnskapsdeling og innovasjon.

Urbane og rurale område har ulike utfordringar, og løysingane må vere tilpassa dette mangfaldet. Digitalisering, teknologi og samarbeid skal bidra til meir effektive, trygge og inkluderande tenester i heile Vestland.

Vestland skal stimulere til at det vert skapt nye næringar og arbeidsplassar i heile fylket gjennom omstilling, grøn konkurransekraft og entreprenørskap.

Vi skal bruke Vestland sine styrkar, som høgt utdanningsnivå, sterke forskingsmiljø og globale næringar, til å fremje grøn omstilling, nyskaping og inkluderande vekst i både privat og offentleg sektor.

Dette inneber at vi skal:

• Utvikle nye verdikjeder og forretningsmodellar innan sirkulærøkonomi.
• Styrke tilgang til fornybar kraft og betre energieffektivisering.
• Samordne mobilitet, logistikk og breiband med arealbruk.
• Setje av areal for berekraftig næringsutvikling, på land og i sjø.
• Vurdere klima-, natur- og samfunnskonsekvensar i all utvikling.

Fylkeskommunen tek eit heilskapleg ansvar for kompetansepolitikken, og skal utvikle planar som sikrar tilgang på rett kompetanse til arbeidslivet. Alle skal ha moglegheit til å ta utdanning og delta i arbeidslivet, ut frå eigne føresetnader.

Det skal også satsast på:

• Natur- og kulturbasert næringsliv som kan skape arbeidsplassar lokalt.
• Løysingar for helse- og omsorgssektoren i omstilling.
• Heilskapleg forvalting av mineralressursar og massar.

Eit framtidsretta arbeids- og næringsliv i Vestland må vere grønt, inkluderande og tilpassa regionale behov og moglegheiter.

Vestland skal bidra til energieffektivisering og tilgang til fornybar energi utan å forringe naturmangfaldet.

Overgangen til fornybar kraft er avgjerande for verdiskaping og berekraftig utvikling i Vestland. I planperioden skal vi styrkje produksjonen frå fornybare kjelder og samstundes redusere behovet for ny kraft gjennom effektivisering og smart bruk.

Det betyr at vi skal:

• styrkje kraftforsyninga og energioverskotet frå fornybare kjelder.
• redusere unødig vekst i kraftbehov gjennom effektiv energibruk.
• prioritere gjenbruk av nedbygde areal framfor inngrep i urørt natur.
• planleggje bustader, næring og fritidshus med omsyn til krafttilgang og naturverdiar.

Vestland skal:

• støtte utvikling av karbonfangst og -lagring, hydrogen, batteri og grøn skipsfart.
• prioritere industri og næringar som tek i bruk energigjenvinning, fleirbruk og sambruk.
• stimulere offentleg sektor til å ta i bruk overskotsenergi og utvikle fleksible energiløysingar.

Eit godt utbygd kraftnett og samarbeid mellom kommunar er viktig for å løyse arealbehov for både energi, næring og infrastruktur på ein måte som tek vare på klima og naturmangfald.

Vestland skal sikre høg deltaking i arbeids- og samfunnsliv gjennom gode oppvekstvilkår, livslang læring og attraktive lokalsamfunn.

Ein trygg og god oppvekst er grunnlaget for eit inkluderande samfunn. Vestland skal styrkje innsatsen for barn og unge, frå tidleg barndom til vaksenlivet. Samtidig må vaksne ha tilgang til relevant kompetanse for å delta i eit samfunn i rask endring.

Vi skal:

• utvikle etter- og vidareutdanningar som møter behova i næringslivet og offentleg sektor.
• skape felles løysingar for kompetanse og karriererettleiing.
• leggje til rette for at fleire innvandrarar får busetjing, arbeid og deltaking.
• tilby heilskaplege løysingar for grupper som står i fare for å falle utanfor skule og arbeidsliv.

Attraktive og inkluderande lokalsamfunn er viktige for trivsel og deltaking. Vestland skal:

• prioritere gode fellesarenaer, tenester og infrastruktur i sentrale område.
• bruke arkitektur og kunst til å skape trygge og funksjonelle omgjevnader.
• satse på idrett, kultur, nærfriluftsliv og grønstruktur i by og bygd.
• utvikle mobilitetsløysingar som gjer kvardagen enklare for alle.

Alt dette bidreg til bulyst, deltaking og sterke fellesskap i heile fylket.

Vestland skal styrke innsatsen for å redusere sosial ulikskap og utvikle eit mangfaldig og inkluderande samfunn.

Alle innbyggjarar skal ha like moglegheiter og oppleve tilhøyrsle. I eit sosialt berekraftig Vestland skal vi byggje ned barrierar for deltaking, både fysiske, strukturelle og kulturelle. Lokalsamfunn med høg tillit og sterke fellesskap er grunnlaget for demokrati og livskvalitet.

Det betyr at vi skal:

• sikre sosial rettferd og like livssjansar for alle.
• jobbe for betre folkehelse, styrkt livskvalitet og førebygging av einsemd og utanforskap.
• planleggje universelt utforma bustader, nærmiljø og offentlege rom.
• ta ungdom, mangfald og generasjonsmangfald på alvor i samfunnsutviklinga.

Vestland skal:

• legge til rette for brei deltaking i lokaldemokrati og planlegging.
• vere ein aktiv pådrivar for antirasisme og arbeid mot diskriminering.
• støtte integrering og mangfald som ressurs i lokalsamfunna.
• prioritere dei som står i fare for å falle utanfor når ressursar og tiltak skal fordelast.

Å sikre tilgang til bustad, arbeid, utdanning, mobilitet og helsetenester og gode møteplassar for kultur og fritid, er avgjerande for å utjamne forskjellar og byggje sterke, inkluderande nærmiljø.

Vestland skal stimulere til at Bergen og dei regionale sentera skal vidareutviklast som attraktive stadar og motor for utvikling, kombinert med støtte til livskraftige og attraktive lokalsamfunn i bygdene.

Ei tydeleg og samordna utvikling av byar, tettstader og bygder gir grunnlag for berekraftige lokalsamfunn over heile Vestland. Regional plan for areal og mobilitet skal fastsetje eit utbyggingsmønster og ei senterstruktur som heng saman med mobilitet, energi og offentlege tenester og gir føreseielege rammer for investeringar.

Det betyr at vi skal:

• styrkje Bergen som motor for utvikling, næring, kunst, kultur og kunnskap.
• vidareutvikle sterke regionsenter som støttar opp under bu- og arbeidsregionar.
• støtte bygdene i å utvikle attraktive og livskraftige lokalsamfunn.
• planleggje tettstadene ut frå lokale behov og føresetnader.

Vestland skal:

• bruke arkitektur, estetikk og kultur som verktøy for inkludering og livskvalitet.
• sikre tydelege sentrum og møteplassar i byar og tettstader.
• ta vare på blågrøne strukturar også innanfor byggesona.
• legge til rette for mjuk mobilitet og sentrale knutepunkt i kollektivsystemet.

Vi skal kombinere sterke byregionar med robuste lokalsamfunn i heile fylket for å skape ein attraktiv, inkluderande og berekraftig bustadstruktur for framtida.

Vestland skal styrke det breie perspektivet på samfunnssikkerheit og beredskap i alle sektorar.

Berekraftige og trygge lokalsamfunn krev at vi er førebudde på kriser og langsiktige endringar, frå ekstremvêr til geopolitisk uro. Det handlar både om førebygging, planlegging og styrking av naturens eigen evne til å dempe risiko. Eit trygt samfunn byggjer på god planlegging, robuste lokalsamfunn og tett samspel mellom kommunar, næringsliv og innbyggjarar.

Det betyr at vi skal:

• fremje samfunnssikkerheit og beredskap gjennom planlegging og sakshandsaming.
• styrkje kompetansen og evna til å handtere risiko og kriser i offentleg sektor.
• sikre at det bur folk i heile fylket, for å oppretthalde beredskap og samfunnsstruktur.
• bruke naturbaserte løysingar for å dempe klimarisiko og naturfarar.

Vestland skal:

• støtte kommunane i arbeidet med risiko- og sårbarheitsanalysar (ROS) og beredskapsplanlegging.
• styrkje arbeidet med klimatilpassing og føre-var-tenking.
• ivareta naturmangfald, jordvern og matproduksjon som del av beredskapen.
• bidra til sikre buområde, drikkevatn og robuste nærmiljø med god sosial og natursikker struktur.

Samfunnssikkerheit handlar ikkje berre om tryggleik i dag, men om å planleggje for ein berekraftig og motstandsdyktig framtid, for både menneske, natur og infrastruktur.

Vestland skal forvalte natur-, landskaps- og kulturverdiar i eit langsiktig perspektiv og følgje opp Montrealavtalen frå 2022.

For å vere ein berekraftig, attraktiv og konkurransedyktig region, må vi ta godt vare på naturmangfaldet og kulturarven. Vi skal følgje opp Montrealavtalen frå 2022, som set mål for bevaring og restaurering av natur, og vi vil tilpasse arbeidet etter stortingsbehandlinga av Meld. St. 35 (2023–2024).

Dette betyr at vi skal:

• få betre oversikt over arealbruk, naturtypar, naturrisiko og sårbarheit – både innanfor og utanfor byggesona.
• dele metodar, verktøy og data saman med kommunar og forskingsmiljø.
• utvikle regionale vurderingar som gir føreseielegheit og reduserer arealkonfliktar.
• styrkje heilskapsperspektivet og kunnskapen om internasjonale verdiar, som UNESCO-område og leveområde for villrein.

Vestland skal:

• støtte kommunane i arbeidet med naturvennleg planlegging og arealnøytralitet.
• bidra til sterkare fagmiljø og nettverk for naturforvaltning og kulturminne.
• hjelpe næringslivet med å bli meir areal- og energieffektivt og handtere naturrisiko.
• løfte fram kulturlandskap og kulturmiljø som ressursar for verdiskaping, identitet og livskvalitet.

Å ta vare på natur og kultur er ein del av beredskapen vår. Det handlar om å forvalte ressursane klokt, for framtidige generasjonar og for dei globale forpliktingane vi deler.

Vestland skal vere ein pådrivar for samordna og styrka innsats for klimaomstilling inkludert nullutslepp.

Vi skal vere ein leiande region i arbeidet med å kutte utslepp og møte klimautfordringane. Dette krev innsats frå heile samfunnet, frå offentlege verksemder til næringsliv, lokalsamfunn og innbyggjarar.

Det betyr at vi skal:

• kutte alle fossile utslepp og redusere energibehovet i alle sektorar.
• auke bruken av fornybar energi og energieffektive løysingar.
• ta i bruk sirkulær økonomi og gjenbruk som grunnlag for verdiskaping og innovasjon.
• samordne bustad-, areal- og transportplanlegging for å støtte grøn utbygging og redusere klimarisiko.
• satse på miljøvenleg transport både til lands og til vanns.

Vestland skal:

• vere pådrivar for nullutslepps bygg- og anleggsverksemd og berekraftig landbruk basert på lokale ressursar.
• støtte næringslivet i å utvikle sirkulære forretningsmodellar med lågt klima- og naturfotavtrykk.
• stille krav til berekraft i offentlege innkjøp og støtteordningar.
• bruke alle tilgjengelege verkemiddel for å styrkje klimaomstillinga.
• sikre rettferdig omstilling og robuste lokalsamfunn og bruke naturen sine eigne løysingar for å møte klima- og naturmål i samspel.

Klimaomstilling handlar ikkje berre om teknologi og utslepp, men om å saman byggje eit tryggare, smartare og meir berekraftig samfunn.