Dette er utviklingsplanen

Fylket sin grunnleggande samfunnsplan

Utviklingsplanen skal ligge til grunn for samfunnsplanlegginga i fylket i alle sektorar. Den gir oss felles retning og mål vi skal strekke oss mot i lag, og hjelp oss å prioritere.

Å ha ein regional planstrategi er ei lovpålagd oppgåve. I Vestland kallar vi den for Utviklingsplan for Vestland 2024-2028, regional planstrategi. 

• Fire mål: breie mål som også må sjåast i samanheng.
• Seks utfordringsområde: som vi må ta omsyn til når vi planlegg. 
• Ti strategiar: skal hjelpe oss å nå ønska samfunnsutvikling.
• Ein plan for planane: oversikt over kva område som treng regionale planar. 

To raude trådar

Berekraft går igjen i planstrategien som ein raud tråd i alt vi skal gjere. Utviklingsplanen bygger på FNs berekraftsmål. 

Samarbeid og samhandling er styrka i utviklingsplanen. Vi skal bli enda betre på strategisk og langsiktig samarbeid i fylket, og samhandle for å nå ønska berekraftig utvikling. 

Utviklingsplanen gir oss svar

• Kvar er vi? 
  Den viser status for fylket: utfordringar og moglegheiter med grunnlag i ferske fakta og ny statistikk for regionen, samla i eit grundig kunnskapsgrunnlag. 
• Kvar vil vi? 
  Korleis vil vi at fylket vårt skal sjå ut om fire år, eller om 20? Planstrategien set opp fire satsingsområde og hovudmål vi skal jobbe mot i lag.
• Korleis gjer vi det?
  10 overordna strategiar skal hjelpe oss å nå utviklingsmåla. Eit styrka samarbeid i fylket og å sjå samanhengar bidreg til måloppnåing. 

Kven gjeld planen for?

Planstrategien er heile fylket sitt viktigaste verktøy for ei felles berekraftig utvikling. Fylkeskommunen, kommunane, og regionale statsetatar, organisasjonar og institusjonar skal legge den til grunn for vidare planarbeid, samfunnsutvikling og tiltak i regionen. Den gir alle offentlege verksemder i fylket eit felles prioriterings- og avgjerdsgrunnlag, slik at vi saman kan nå ønska utvikling og hovudmål.  Fylkeskommunen er regional planmynde. Vi håpar og at utviklingsplanen mobiliserer andre samfunnsaktørar til å vere med å dra i riktig retning.