Vi søker prosjekta som kan forme framtida og styrke verdiskapinga i Vestland

Vestland fylkeskommune lyser no ut 18 millionar kroner med søknadsfrist 15. april.

I 2026 ønskjer hovudutval for næring å særleg prioritere satsingar på kunstig intelligens og digital teknologi, tilgang på eigna areal for næringsutvikling og prosjekt som involverer fleire kommunar i same bu- og arbeidsmarknadsregion.

– I år ønskjer vi mellom anna prosjekt som hjelper kommunane å sjå næringsutvikling, arbeidsplassar og bustader i samanheng. Skal vi lukkast med verdiskaping i Vestland, må kommunane jobbe tettare saman i bu- og arbeidsmarknadsregionar, slik at det blir attraktivt både å jobbe, bu og etablere verksemd her, seier Sigrid Brattabø Handegard, leiar av hovudutval for næring i Vestland fylkeskommune.

Fire satsingar 

Prosjekta skal vere forankra i regionale behov og samarbeid mellom partnarar. Dei må vere kopla  til måla for ordninga og minst ei av dei fire satsingane i planen Berekraftig verdiskaping – regional plan for innovasjon og næringsutvikling. Alle søknader må tydeleg vise at prosjektet representerer noko nytt, og gir tilleggsverdi utover tiltak og prosjekt som alt eksisterer.

Satsingane er

• grøn næringsutvikling

• areal til næringsutvikling

• innovative og inkluderande samfunn

• kompetanseutvikling i arbeidslivet

Justeringar frå 2025

 Til utlysinga i år er det er gjort nokre justeringar i den tematiske innrettinga: 

• Under satsinga grøn næringsutvikling etterspør vi prosjekt som bidreg til å styrke bruk av kunstig intelligens og digital teknologi for å styrke verdiskaping og samfunnstryggleik/beredskap i Vestland. 

• I satsinga areal til næringsutvikling etterspør ein spesielt prosjekt retta mot utvikling av grå areal som alternativ til utvikling av nye areal til næringsføremål, inkludert kartlegging av potensielle transformasjonsområde.   

• For satsinga innovative og inkluderande samfunn etterspør ein spesielt prosjekt som skal styrke kommunane sitt arbeid med verdiskaping, sysselsetting og bustadpolitikk i ein bu- og arbeidsmarknadsregion.