Årets spelemidlar er fordelte: Over 336 millionar til anlegg i Vestland
No kjem det pengar til fleire fotballbaner, basseng, motorsportbaner, padelanlegg, pumptrackbaner, turstiar og andre anlegg for idrett og fysisk aktivitet.
Hovudutval for kultur, idrett og inkludering hadde møte 18. juni og fordelte då årets spelemidlar. Spelemidlane er del av overskotet til Norsk Tipping og går til både ordinære idrettsanlegg og nærmiljøanlegg.
Folkehelse, breiddeidrett og toppidrett
– Spelemidlane er sjølve fundamentet for anleggsutvikling her i landet. Ved å finansiere alt frå lysløyper til idrettshallar gjer dei terskelen for å røre seg lågare for alle. Midlane er også den økonomiske ryggrada vi treng for å finansiere moderne anlegg, der talenta får utvikle seg. Slik heng folkehelse og olympiske medaljar saman, seier Jacob Nødseth, leiar for hovudutval for kultur, idrett og inkludering.
Vestland fylkeskommune fekk i år i overkant av 283 mill. kr i spelemidlar frå Kultur- og likestillingsdepartementet. Medrekna 15 mill. kr i renter og 37,5 mill. kr i tilbakebetalte midlar, vert den samla spelemiddelpotten i Vestland over 334 millionar i 2026.
Nesten 100 millionar til Bergen
Nesten 301 mill. kr går til ordinære idrettsanlegg. Bergen er den kommunen som får den største samla summen med 98,5 millionar. Dei største løyvingane i Bergen er 22 mill. kr til Bjarg Arena og 21 mill. kr til Sædalen idrettshall 2.
Etter Bergen følgjer Askøy med 43,3 mill. kr, Stord med 30 mill. kr og Sogndal med 14 mill. kr. Askøy kommune får blant anna 28 mill. kr til 25 meters symjeanlegg på Kleppestø idrettspark. Stord får 27 mill. kr til ishall, og Sogndal får 5,5 mill. kr til opplæringsbasseng i Sogndal symjehall.
Øygarden får mest til nærmiljøanlegg
Nesten 34 millionar av årets spelemidlar i Vestland går til nærmiljøanlegg. Det er utandørs anlegg eller område for eigenorganisert fysisk aktivitet, lokalisert i tilknyting til bu- og/eller opphaldsområde.
Her er det Øygarden kommune som får den største samla tildelinga med 8 mill. kr. Anlegg ved Ågotnes skule, Hjelteryggen skule, Brattholmen skule og Øygarden ungdomsskule er blant det som får pengar.
Neste kommune på lista er Alver, som blant anna får støtte til fem anlegg ved Knarvik rulle- og aktivitetspark. Bergen får 3,8 mill. kr til nærmiljøanlegg, medan Kinn og Sunnfjord får 1,7 mill. kr kvar.
Det er også sett av om lag 2 mill. kr til eventuelle klager.