Storsatsinga på sykkelvegar held fram i Miljøløftet

Miljøløftet jobbar for at fleire skal gå, sykle og reise kollektivt i Bergensområdet. Gjennom byvekstavtalane samarbeider stat, fylkeskommune og kommune om det nasjonale målet om nullvekst i persontransport med personbil.  

Miljøløftet er namnet på dette samarbeidet, som består av ni partar: Bergen, Alver, Askøy, Bjørnafjorden og Øygarden kommunar, Vestland fylkeskommune og dei statlege verksemdene Statens vegvesen, Jernbanedirektoratet og Statsforvaltaren i Vestland.  

Alle partane kan spele inn forslag til tiltak eller prosjekt som skal bidra til å nå nullvekstmålet. Miljøløftet sitt Handlingsprogram 2025–2028, er ei oversikt over investeringane som Miljøløftet planlegg dei neste fire åra, og inneheld prosjekt på om lag fem milliardar kroner. Prosjekta i Miljøløftet har tre hovudfinansieringskjelder; det fylkeskommunale bidraget, ulike statlege tilskot og bompengar. 

Fylkeskommunale midlar gir fleire sykkel- og gangvegar 

Vestland fylkeskommune bidreg i gjennomsnitt med 366 mill. årleg (2025-kr) til Miljøløftet. Bidraget skal i hovudsak gå til tiltak for kollektivtrafikk, sykling og gåing, men skal også kunne omfatte investeringar i bybanevogner, infrastruktur for låg- og nullutsleppsteknologi i kollektivtrafikken, tiltak til driftsinfrastruktur for kollektivtrafikken, i tillegg til vedlikehaldstiltak med investeringskarakter på fylkesvegnettet i avtaleområdet. 
 
For 2025 er det sett av midlar til pågåande sykkel- og gangvegprosjekt i Apeltunvegen, Hagerupsvegen og Klostergaten. I tillegg er det sett av midlar til Nonneseter (riving av Sølvvarefabrikken og opparbeiding av området). Seinare i perioden er det sett av midlar til prosjekta Hesthaugvegen, Kjøkkelvikvegen og kryss ved Tennebekk.

Saknar statleg støtte til prosjektfasen 

Sykkelprosjekta Nattlandsvegen og Storetveitvegen (Hagerupsveg – Minde allè og Hagerupsveg – Fantoft) ligg inne i handlingsprogrammet med statleg finansiering. Staten dekker ikkje prosjekteringskostnader og mva når dei løyver midlar til prosjekt på fylkesveg og kommunal veg. Prosjektfasen vert difor ein tilleggskostnad for fylkeskommunen. I handlingsprogramperioden (2025-2028) er det samla lagt inn 184 millionar kroner i fylkeskommunale midlar til prosjekteringskostnader for desse sykkelprosjekta.  
Fylkeskommunen har tidlegare spelt inn at det er svært uheldig at staten ikkje dekker prosjekteringskostnader når dei løyver midlar til prosjekt på fylkesveg og kommunal veg. 

– Dette har vi spelt inn både gjennom Miljøløftet sine fora og i eigne møter med staten. Framlegget til NTP gjev ingen signal om at staten ynskjer å ta eit større ansvar for slike prosjekt, uttalar Askeland. 

Politikarane røysta fram sykkelveg Askøybrua-Kjøkkelvikvegen

Då handlingsprogrammet var til handsaming på fylkestinget den 19. juni, vart det gjort fleire tilleggsvedtak i saka. Fylkestinget slutta seg handlingsprogrammet, men med eit tillegg i vedtaket. Politikarane ynskjer ein auka innsats for å få fleire over på sykkel, til dømes med prosjekt og kampanjar som «test el-sykkel ei veke». 
 
Eit samrøystes fylkesting vedtok også i nytt punkt to at Miljøløftet må sjå på moglegheitene for å sikre ein samanhengande sykkelveg frå Askøybrua til Kjøkkelvikvegen. Strekninga er ein av dei siste strekka som må gjerast noko med for å få ei samanhengande sykkelveg frå Askøy til Bergen.
 
– Det er mange som syklar frå Askøy til Bergen, og det er godt utbygd sykkelvegnett frå Kleppestø. Men nokre små delar står att, og akkurat dette siste strekket er det ønskeleg å få bygd, seier fylkesordførar Jon Askeland. 
 
Endå eit tilleggsvedtak vart gjort. Fylkestinget vedtok samrøystes i nytt punkt tre at Miljøløftet må vurdere å utvide samkøyringsprosjektet til Skyss til fleire kommunar enn i dag.  
 
Til saka PS 54/2024: Miljøløftet sitt handlingsprogram for perioden 2025– 2028