Vestland fylkeskommune fekk inn 26 søknader med ein samla søknadssum på nær 4, 5 millionar kroner.
Mange gode søknadar
Eit av hovudmåla med ordninga er å stimulere til samhandling mellom kunnskapsmiljø og kunst- og kulturlivet elles for å aktualisere landslova, og fremje varige institusjonelle samarbeid. Det kom inn mange gode søknader frå store delar av fylket, med stor variasjon både når det gjeld storleik, geografisk omfang og tematisk tilnærming.
Vestland har fleire kulturminne frå perioden kring Magnus Lagabøte sin regjeringstid og Landslova. Dei dannar ei flott historisk ramme kring fleire arrangement.
Variasjon og mangfald
Prosjekta har ei variert målgruppe og omfattar eit mangfald av kunst- og kulturfagleg innhald. Blant prosjekta finn vi Mellomalderfestival i Bergen, jubileumsprogram med utgangspunkt i historia om Audun Hugleiksson i Sunnfjord, samarbeidsprosjektet «Alt er lov» i Nordhordland og Lagabøte-turné med litteraturbåten Epos.
Det blir konsertar og arrangement mellom anna i regi av festspela i Bergen i historiske rammer i Rosenkrantztårnet, Håkonshallen, Bergen Domkirke og steinkyrkjer i Sogn. Nokre prosjekt går i djupna på kjeldematerialet frå mellomalderen som til dømes på Voss, der tema blir korleis ein kan spore innhald frå Landslova i den juridiske praksisen i ei norsk bygd i overgangen mellom 1200- og 1300-talet.
Utstilling og kunnskapsformidling
Baroniet i Rosendal/Den Weis-rosenkroneske, skal formidle kunnskap om «Gaut Jonsson til Mel» i dagens Rosendal si rolle i norsk politikk og lovgjeving i Norge på 1200-talet.
Ved Agatunet blir det utstilling i Lagmannsstova. Det unike rettsdokumentet, Bleiediplomet, vart gjeve her. Målet er å syne korleis Landslova regulerte livet til vanlege folk gjennom rettsreglar som gjeld jordskifte, odel og frukthagar – og korleis ho vart handheva i praksis, gjennom døme frå diplomatariet.
