Tilskot til nasjonale og internasjonale idrettsarrangement og arenaer

Tilskotsordninga skal bidra til at aktørar i Vestland blir tildelt berekraftige nasjonale og/eller internasjonale idrettsarrangement. Med berekraft meiner vi miljømessig-, økonomisk- og sosial berekraft. 

Tilskotsordninga kan gi økonomisk støtte til:

• idrettsarrangement av nasjonal og internasjonal karakter som gjev samfunnsverdi, inkludering og synleggjering av idretten i Vestland
•  etablering, utvikling og oppgradering av anlegg som legg til rette for gjennomføring av
  nasjonale og/eller internasjonale idrettsarrangement 

Målgruppa for ordninga er innbyggjarane og idretten i Vestland, som får betre tilgang til attraktive idrettsanlegg og arenaer for store arrangement. Ordninga skal òg kome lokale og regionale idrettsmiljø, frivillig sektor, vertskommunar og tilreisande til gode, gjennom styrka aktivitets- og arrangementstilbod og positive ringverknader for reiselivet.

Kven kan søkje om støtte?

• kommunar i Vestland
• organisasjonsledd knytt til Noregs idrettsforbund, Noregs Bilsportforbund og Det frivillige Skyttarvesen
• idrettslag med adresse i Vestland

Prioriteringar og satsingar 

• prosjekt som bidreg til berekraft, universell utforming og innovasjon
• prosjekt som har nasjonalt og internasjonalt nedslagsfelt 
• samarbeidsprosjekt mellom fleire aktørar
• prosjekt som styrkar Vestland som vertskap for idrettsarrangement 
• arrangementsutstyr som særforbunda krev for å gjennomføre idrettsarrangement som ikkje er dekka av spelemiddelordninga for anlegg og idrettsutstyr
• idrettsarrangement som er likestilt med nasjonale meisterskap som til dømes landsskyttarstemne
• kommunar og idrettslag / særforbund som har fått tildelt eit nasjonalt eller internasjonalt arrangement
• idrettsarrangement som har særleg fokus på å inkludere paraøvingar som del av arrangementet
• søknader med ein tydeleg miljøprofil til dømes miljøsertifisering eller andre miljøretta tiltak
• rekruttering og opplæring av frivillige

I søknaden skal du presisere kva for prioritering(ar) ditt prosjekt svarar ut, og korleis prosjektet oppfyller føremålet til ordninga.

Arrangement som har motteke tilskot frå denne ordninga tre år på rad vil ikkje bli prioritert. Desse kan søkje tilskot gjennom driftstilskotsordninga til Vestland fylkeskommune. 

Dette støttar vi:

• investeringstilskot til store kostnadskrevjande idrettsanlegg som har regional og nasjonal verdi, der ein kan arrangere nasjonale og internasjonale arrangement
• støtte til gjennomføring av idrettsarrangement med minimum nasjonalt nedslagsfelt og minimum juniornivå (frå 16 år)
• bygningskostnadar for anlegg for idrett og fysisk aktivitet som har særleg fokus på berekraft, nyskaping og innovative løysingar

Det kan ikkje bli gitt tilskot til: 

• anleggsprosjekt som er gjennomført/stilt ferdig
• detaljprosjektering/byggesakskostnadar
• arrangement og prosjekt utanfor Vestland
• lokale- og regionale idrettsarrangement 

Søknaden må innehalde:

• prosjektskildring
• budsjett og finansieringsplan
• skildring av kommunal medverknad og forankring
• dokumentasjon på eigarskap og / eller rett til bruk av anlegg / areal
• for investeringssøknader: anleggsnummer

Anlegget det blir søkt om støtte til, skal vere forankra i ein vedteken kommunal plan som omfattar fysisk aktivitet, idrett og friluftsliv. 

Søknaden knytt til arrangementssanlegg skal innehalde ei vurdering frå respektivt særforbund om den nasjonale verdien til anlegget, og kva arrangement anlegget er planlagt å vere vertskap for. Om det blir søkt om investeringstilskot til eit anlegg innan same idrett som finst frå før i Vestland, er det opp til søkar å skildre kva som skil anlegget frå det som allereie eksisterer. Søknaden må i tillegg vere i tråd med gjeldande satsingar i anleggs- og tildelingspolitikken til Vestland fylkeskommune.

Søknadene blir vurdert ut i frå følgjande kriterium:

• grad av måloppnåing i høve til ordninga sitt føremål 
• realisme i budsjett og gjennomføringsplan
• samfunnsnytte og aktivitetspotensial
• innovasjon og berekraft
• samarbeid og medfinansiering
• behovsvurdering av prosjektet

Tilskotsbeløpet blir basert på prosjektstorleik, budsjett og tilgjengelege midlar. Det er krav til eigeninnsats i prosjekta. Vidare blir tilskotet vurdert utifrå godkjent finansieringsplan, eventuelt godkjend kostnadssum på spelemiddelsøknaden og eventuelt tilskot frå andre fylkeskommunale støtteordningar. 

Vestland fylkeskommune legg forvaltningslova til grunn for all søknadsbehandling. Alle søknader er i utgangspunktet offentleg tilgjengelege, jf. forvaltningslova. 

Avdeling for kultur og folkehelse førebur og gjer kulturfaglege vurderingar av søknadene, som blir lagt fram for politisk behandling og vedtak i hovudutval for kultur, idrett og inkludering. 

Fylkeskommunen gjer enkeltvedtak i kvar søknad. Vedtak om tilskot eller avslag skal grunngjevast, i tråd med forvaltningslova. Søknadene skal vanlegvis vere behandla innan tre månader etter søknadsfristen.

Du kan klage på enkeltvedtak som fylkeskommunen har gjort, i tråd med forvaltningslova § 28 andre ledd. Klagefristen er tre veker og blir rekna frå den du fekk melding om vedtaket. 

Klagenemnda i fylkeskommunen behandlar klaga. I klaga må du skrive kva vedtak du klagar på, kvifor du meiner vedtaket er feil, og kva du ønskjer endra. Du sender klaga til Vestland fylkeskommune. 

Tilskotet skal brukast slik det står i retningslinjene og i vedtaket om tilskot. Prosjektet skal gjennomførast på den måten og i det tidsrommet som er oppgitt i søknaden. Dersom det skjer vesentlege endringar i prosjektet, må tilskotsmottakaren melde frå skriftleg til saksbehandlar for vurdering og godkjenning. 

Tilskotsmottakar skal levere rapport om bruken av tilskotet til fylkeskommunen når prosjektet er avslutta. Fylkeskommunen kan og krevje rapport undervegs. Sluttrapporten skal innehalde rekneskap for prosjektet og annan informasjon som er nødvendig for at fylkeskommunen kan
kontrollere bruken av midlane og oppfylle sine plikter. For tilskot over 500 000 kr skal rekneskapen vere stadfesta av revisor.

Fylkeskommunen kontrollerer at tilskotet er brukt i tråd med føresetnadene, basert på ei vurdering av risiko og vesentlegheit. Tilskotsmottakar skal gi alle nødvendige opplysningar dersom fylkeskommunen ber om det.

Fylkeskommunen kan krevje heile eller delar av tilskotet tilbake dersom det er utbetalt tilskot i strid med retningslinjene, eller om tilskotet ikkje er nytta i samsvar med føresetnadene for tildelinga