Fylkesutvalet er positiv til havvind
- Vestland fylkeskommune er særs positive og heier på utvikling av havvind, men det er viktig for oss å sei at naturmangfald og vesentlege interessekonfliktar må bli tatt omsyn til, seier fylkesvaraordførar Natalia Golis.
Fylkesutvalet, leia av fylkesvaraordførar Golis, gav i møtet 6. juni sine innspel til ei høyring frå NVE og fleire direktorat. Saka gjeld nye og eksisterande område for havvind.
Har sett på nye område
NVE har saman med Fiskeridirektoratet, Miljødirektoratet, Kystverket, Oljedirektoratet og Forsvarsbygg, hatt i oppdrag å føreslå område som gjer det mogleg å tildele areal tilsvarande 30 GW produksjonskapasitet for havvind innan 2040. 30 GW svarar til omtrent like mykje som kraftforbruket i Noreg i dag.
Her er høyringsfråsegnet slik det blei vedtatt av fylkesutvalet 6. juni
Vestland fylkeskommune er positiv til utvikling av havvind gitt at dette kan skje utan omfattande tap av naturmangfald og vesentlege interessekonfliktar. Ved fastsetting av mål for havvind på norsk sokkel må ein ta forbrukaromsyn knytt til forventa straumpris og auke i nettleige knytt til nettutbygging. Vestland fylkeskommune har følgjande innspel til program for strategisk konsekvensutgreiing av nye område til fornybar energiproduksjon til havs;
1. Framlegg til nye område synest å danne eit godt utgangspunkt for å realisere mål om utvikling av havvind på norsk sokkel. Dette gjeld både i høve produksjonsmål, og i høve mål om å vidareutvikle norsk posisjon som leiande innan flytande havvind.
2. Det er viktig at utviklinga vert basert på oppdatert kunnskap, og at det vert lagt stor vekt på å unngå interessekonfliktar. Det må særleg takast omsyn til fiskeri- og havbruksinteresser og til biologisk mangfald, inkludert våre forpliktingar i forhold til naturavtalen, og det må haldast tett dialog med organisasjonar som representerer desse interessene.
3. God kartlegginga av verknader for mellom anna fiskeri, naturmangfald, havbruk, forureining, kraftsystem, teknisk infrastruktur, petroleum, CO2 og skipsfart vil vere viktig felles konsensusbasert kunnskap som vil redusere konfliktnivået for havvindutbygging.
4. Havvind gjev størst verdiskaping for Noreg om den etablerast utom kysten av Vestland. Det er førespegla stor forbruksauke i ytre deler av Vestland. Ilandføring av kraft her utløyser eit stort verdiskapingspotensial i regionen og landet. I tillegg ligg det store areal som nyttast til utvinning av petroleum utom kysten av Vestland. Store deler av denne næringa treng elektrisk kraft for å ta bort utleppspunkta på sokkelen.
For meir informasjon, les saksframlegget. Det finn du ved å klikke på lenka og gå inn på sak PS 127/2023.